Vit i mjerimit!

nga Agim Popoci

Vit pa opozitë parlamentare, vit pa zgjedhje të lira dhe të ndershme dhe së fundi vit pa lirinë e shprehjes por me Kryeministër që të urdhëron ta shikosh edhe në sy!

Ndoshta sot Kryeministri Edi Rama edhe ka të drejtë!

Fillimjanari i këtij viti ishte shpresëdhënës ndërkohë që terrori shtetëror po shtohej, radhët e protestave në Bulevard ishin në rritje e sipër ndonëse po vazhdonte largimi nga vendi që po keqqeverisej nga Edi Rama.

Gjysma e dytë e Shkurtit 2019 ishte shumë më shpresëdhënëse kur deputetët e opozitës u bënë një me qytetarin duke dorëzuar mandatet, në mënyrë që të sensibilizojnë edhe ndërkombëtarët, që kishin mbyllur sytë para Shqipërisë me kanabis, korrupsion që kishte kapur majat dhe Kryeministrin Edi Rama që me një këmbë kishte shkelur në diktaturë.

Por zgjedhjet lokale të këtij viti, nuk ishin vetëm hapje krahu e diktatorit tashmë të kurorëzuar por shkelja me këmbë në një etapë të re duke krijuar dy botë  shqiptare, që historia do ti njohë si “para dhe pas 30 Qershorit”.

Historia e zgjedhjeve moniste do të diskutohet për shumë kohë por ato nuk ishin dhe nuk janë turp vetëm për diktatorin e dytë shqiptarë, por një turp për kombin që lejon diktaturën edhe në vitin 2019, kur Shqipëria është anëtare e NATO-s dhe vazhdon të qëndroj në paradhomën e BE; Paradhomë kjo e cila do ti ofroj të gjitha facilitetet që ofron një organizëm ndërkombëtar si BE por jo edhe integrimin e mjerimit në Bashkimin Evropian.

Po, protestat ndaluan me idenë se edhe mjerimi mund të integrohet në BE, por JO e Bashkimit Evropian nuk ishte një përgjigje kundër mjerimit ekonomik dhe qytetar që sot ka pushtuar kombin shqiptar! Brukseli zyrtar nuk i tha JO vetëm mirëqenies shqiptare, por i tha JO edhe qytetarisë së këtij kombi në shuarje që sundohet nga një injorant i cili nuk është asgjë më shumë se një komunist me penel në dorë! Me penel që për 50 vjet nuk bëri dot një pikturë për tu shënjuar në historinë shqiptare por që skicoi dhe realizoi mjerimin e një kombi për vetëm pesë vjet!

Dhe shumë shpejtë, bilanci i fundvitit do të jap edhe një panoramë të trishtë të një vendi ku shpresa po asfiksohet! Nga Janari i protestave të opozitës që nuk po e lënin Kryeministrin të bëjë një sy gjumë të qetë, Shqipëria mbyllë kapitullin e këtij viti me urdhrin e Edi Ramës duke i thënë shqiptarëve ta shikojnë në sy sepse pas 6 vjet qeverisjeje kriminale, në sytë e tij, ky është një fillim i ri!     

Ky fundvit me një bilanc mjerimi ku përfshihet edhe fatkeqësia natyrore që goditi Shqipërinë me tërmetin e 26 Nëntorit, me ose pa tërmet, ishte parashkruar që në muajin Janar si vit mjerimi. Por jo vetëm kaq! Pa kujdesin e të prekurve nga tërmeti por me shumë premtime dhe me ardhjen në jetë të koncesioneve PPP që do ti marrin edhe grahmat e fundit këtij shteti të vjedhur që nuk po e merr dot veten sa nga politika shqiptare ashtu dhe kriminelët në shërbim të saj, e çuditshme ose jo, nesër shqipëtarët do ta kërkojnë edhe këtë vit të mjerimit sepse përveç shpresës, është cenuar dhe e ardhmja e këtij vendi.  

Sot, në fund të këtij viti, Shqipëria e ka të qartë se ekzistojnë dy botë shqiptare, para dhe pas 30 Qershorit; Nesër kur Edi Rama nuk do të jetë më Kryeministër por mjerimi do të jetë edhe më i thellë, bashkë me të do të bashkëjetojnë me ne edhe dy botë shqiptare, para dhe pas Edi Ramës! O mjerim, nuk kemi parë gjë akoma…