Viti 2025 shpallet Viti i Diasporës! Berisha: Diktaturën e parë e rrëzuan studentët, këtë diktaturë do e rrëzojë mërgata

Kryetari i Partisë Demokratike, Sali Berisha, në konferencën e sotme për media u ndal te, sipas tij, dy ngjarje të mëdha për jetën politike të Shqipërisë, Primaret dhe deklarimi i vitit 2025 si Vit i Diasporës!

“Mendoj se Primaret që u zhvilluan ditën e diel në Shqipëri ishin procesi më demokratik që Shqipëria ka njohur ndonjëherë. Në këtë garë të hapur u regjistruan mbi 450 kandidatë, morën pjesë qindra e qindra kandidatë.Ushtruan të drejtën e votës rreth 51 mijë anëtarë të PD-së, votimi më i madh që nga viti 2013.

Dua me këtë rast të përgëzoj të gjithë ata të cilët morën pjesë në këtë proces. Ky votim përbën bazën më demokratike të përzgjedhjes së kandidatëve të PD-së për deputet.

Natyrisht në këtë përzgjedhje disa kritere statusore siç janë kuotat e përcaktuara në statut dhe ligje, për gratë dhe të rinjtë, ato do respektohen sepse nuk mund të kapërcehen përcaktimet statusore.

Imagjinoni ju se çfarë ndodh në krahun tjetër, që kandidaturat përcaktohen nga Bajrët, Troplini, Poja, Çela, Ndoka dhe eksponentë të tjerë të krimit,” tha sot Sali Berisha ndërsa e pranoi se pavarësisht përpjekjeve për të realizuar një proces sa më të drejtë dhe transparent, mungesa e dokumenteve ka ndikuar tek disa anëtarë të PD-së që nuk kanë mundur të votojnë, dhe për ata që nuk votuan për shkak të problemeve me listat ose mungesës së dokumenteve Berisha kërkoi ndjesë.

Me këtë rast lideri i opozitës shpalli vitin 2025 si Vit i Diasporës.

“Pra, 2025-a do hyjë në historinë tonë kombëtare si Viti i Diasporës Shqiptare. Ju nuk keni qenë në takimet që kam pasur në Itali, në Greqi, por u garantoj që në jetën tuaj ju nuk keni parë, dhe imagjinata juaj nuk e rrok dot entuziazmin, shpërthimin e entuziazmit në këto takime.

Një shpërthim i jashtëzakonshëm, një shpërthim i paparë, një energji pozitive, një optimizëm që po të përdorim një term figurativ, vetëm sa nuk çante muret e sallës dhe të stadiumit. Atëherë, nuk mund të mos shpallej viti 2025 si viti i diasporës, pasi i gjithë ky shpërthim eksploziv është një uragan fitoreje,” tha lideri i opozitës duke përfunduar:

“E theksova dje para mijëra e mijëra vetëve në atë stadium dhe e theksoj sot përsëri, në rast se revolucionin e viteve ’90 për përmbysjen e diktaturës, e udhëhoqën studentët liberatorë, tani çlirimtarët e vërtetë të Shqipërisë janë bijtë dhe bijat e saj që kanë mërguar për një jetesë tjetër, por që janë të vendosur të bëjnë gjithçka për të shpëtuar Shqipërinë nga narkodiktatura e Edi Ramës.”

Deklaratë:

Duhet të ndalem në dy ngjarje të mëdha për jetën politike të Shqipërisë.

Mendoj se primaret që u zhvilluan ditën e diel në Shqipëri ishin procesi më demokratik që Shqipëria ka njohur ndonjëherë.

Në këtë garë të hapur u regjistruan mbi 450 kandidatë.

Në këtë garë të hapur morën pjesë qindra e qindra kandidatë.

Ushtruan të drejtën e votës rreth 51 mijë anëtarë të PD-së, votimi më i madh që nga viti 2013.

Dua me këtë rast të përgëzoj të gjithë ata të cilët morën pjesë në këtë proces.

Të përgëzoj kandidatët për guximin dhe vendosmërinë e tyre për të marrë pjesë në garë si përfaqësues të PD në zgjedhjet e ardhshme.

Të përgëzoj të gjithë anëtarë të PD që ushtruan të drejtën e votës dhe votuan për kandidatin që ata vlerësojnë më shumë.

I siguroj ata dhe mbarë shqiptarët që kjo procedurë është e para e këtij lloji që zhvillohet në Shqipëri, është më e mira, më demokratikja se çdo procedurë që mund të zhvillohej në raste të tilla.

Ky votim përbën bazën më demokratike të përzgjedhjes së kandidatëve të PD-së për deputet.

Natyrisht në këtë përzgjedhje disa kritere statusore siç janë kuotat e përcaktuara në statut dhe ligje, për gratë dhe të rinjtë, ato do respektohen sepse nuk mund të kapërcehen përcaktimet statusore.

Por mendoj se këto përmirësojnë përfaqësimin e shoqërisë shqiptare në parlamentin shqiptar, përndryshe nuk ka metodë më të drejtë, më të ndershme se sa kjo për përcaktimin e kandidaturave.

Imagjinoni ju se çfarë ndodh në krahun tjetër, që kandidaturat përcaktohen nga Bajrët, Troplini, Poja, Çela, Ndoka dhe eksponentë të tjerë të krimit.

Përcaktohen nga valixhet me para.

Përcaktohen jashtë të gjitha kritereve.

Ju e patë që Çyrbja, u vendos emri i tij fill pas Edi Ramës sepse përfaqësonte bandën më të rrezikshme.

Këto janë kandidaturat e qytetarëve, e vullnetit të lirë të qytetarëve shqiptarë, anëtarë të PD-së.

Me këtë rast, duke thënë të gjitha këto, përsëri proces të përsosur nuk ka dhe nuk mund të ketë. Por kërkoj ndjesë të gjithë atyre që u paraqitën për të votuar dhe nuk votuan dot për shkak të listës ose mungesës së dokumenteve. Ju kërkoj shumë ndjesë dhe mendoj se PD do bëjë gjithçka që kjo të mos ndodhë.

Megjithëse përcaktoi kriteret më të gjera, të gjitha listat nga viti 2019 e deri tani, të jenë me të drejtë votimi dhe çdo njeri që ka dokumentin dhe këto u respektuan, prapë se prapë mbetën demokratë pa votuar dhe kjo më lëndon dhe unë u kërkoj atyre të falur sot për këtë privim të padrejtë që iu është bërë nga shkaqe burokratike.

Së dyti, numërimi siç e keni parë ju vetë, është bërë me transparencë absolute ku çdo votë është shfaqur në ekran.

Cilido që ka dyshimin më të vogël, ka të drejtë të marrë regjistrimin, t’i drejtohet komisionit të administrimit të zgjedhjeve pranë PD dhe procedurat tona janë 100 përqind transparente.

Zhvillimi i dytë madhor politik është deklarimi i vitit 2025 si viti i diasporës.

Pra, 2025-a do hyjë në historinë tonë kombëtare si viti i diasporës shqiptare.

Ju nuk keni qenë në takimet që kam pasur në Itali, në Greqi, por u garantoj që në jetën tuaj ju nuk keni parë, dhe imagjinata juaj nuk e rrok dot entuziazmin, shpërthimin e entuziazmit në këto takime.

Një shpërthim i jashtëzakonshëm, një shpërthim i paparë, një energji pozitive, një optimizëm që po të përdorim një term figurativ, vetëm sa nuk çante muret e sallës dhe të stadiumit.

Atëherë, nuk mund të mos shpallej viti 2025 si viti i diasporës, pasi i gjithë ky shpërthim eksploziv është një uragan fitoreje.

E theksova dje para mijëra e mijëra vetëve në atë stadium dhe e theksoj sot përsëri, në rast se revolucionin e viteve ’90 për përmbysjen e diktaturës, e udhëhoqën studentët liberatorë, tani çlirimtarët e vërtetë të Shqipërisë janë bijtë dhe bijat e saj që kanë mërguar për një jetesë tjetër, por që janë të vendosur të bëjnë gjithçka për të shpëtuar Shqipërinë nga narkodiktatura e Edi Ramës. Është një uragan i papërmbajtur.

E kam analizuar disa herë me vete këtë situatë, cila është baza e saj. Baza e saj është se ndodhitë dhe zhvillimet në Shqipëri janë më dramatiket, të cilat turpërojnë, lëndojnë çdo njeri të lirë dhe të ndershëm.

Diaspora që jeton në vende të lira ka një vendosmëri absolute për të shembur narkodiktaturën dhe unë u them ju se këta 200 e ca mijë që janë regjistruar, do të pasohen nga të paktën dhe 200 mijë të tjerë që do vërshojnë nga e gjithë Europa për të ardhur dhe ushtruar të drejtën e votës.

Është viti i diasporës.

Është viti i revolucionit të diasporës.

Është viti i djemve, vajzave, burrave, grave të lira të diasporës që do vijnë të përmbysin diktaturën.

E patë ju vetë se çfarë përçmimi tregojnë për Edi Ramën kudo që shkon.

Se çfarë përçmimi tregojnë për Taon e për të tjerët.

E patë, janë me qindra, me mijëra ata që i kanë regjistruar patronazhistët, që do votojnë PD-në.

Ua them unë, të betuar.

Pra, në çdo lloj varianti që ta shqyrtosh këtë vit, i cili do jetë një vit i mrekullisë, siç ishte viti 1992, mrekulli në të cilën shqiptarët përmbysin diktaturën, por këtë herë mrekullia vjen nga diaspora.

Mirënjohjen më të pakufishme të gjithë shqiptarëve jashtë vendit.

Garancinë e plotë dhe zotimin solemn se Shqipëria do bëhet përsëri vendi i ëndrrave të tyre.

Se Shqipëria Madhështore do jetë Shqipëria me të cilën ata do ndjehen krenar, do konsiderojnë rikthimin në Shqipëri apo do ndjehen krenar kudo që të jenë.

PYETJE PERGJIGJE ME GAZETARET

Ermal Rizaj, SYRI TV: Fituesit e primareve në qarqe, a do të jenë në lista të sigurta, automatikisht pas këtyre rezultateve në primare?

Sali Berisha: Kjo garë nuk është bërë për të qenë në lista të sigurta. I sigurtë të jetë, që ai që merr më shumë vota do të jetë deputete në Kuvendin e Shqipërisë. Por padiskutim në përpunimin e listave të mbyllura ky është një nga kriteret kryesore.

Listat e mbyllura kanë aleatët, kanë disa kushtëzime. Janë disa faktorë që ndërhyjnë. Por a do jetë ky një kriter për përfshirjen e tyre. Po, do të jetë një kriter i rëndësishëm gjer në kuotat. Kuotat, megjithëse ju e patë se ka zonja që kanë marrë vota shumë lart dhe nuk ka asnjë vështirësi në këtë mes.

Elda Menga, TCH: Ju ftuat anëtarësinë të shtunën për të votuar në primare. Por mediat nuk kishin në dispozicion numrin e anëtarëve që disponon PD. A mund të na thoni pak, sa është numri i saktë i anëtarëve, dhe në kutitët Vorës dhe Paskuqanit, Komisioni Zgjedhor në PD ka gjetur parregullsia. A mund të na i zbardhni se cilat janë këto parregullsi në këto kuti, dhe a do përsëritet votimi.

Sali Berisha: Numri i saktë i anëtarësisë është shumë e vështirë, sepse ka një lëvizshmëri shumë të madhe të anëtarësisë për shkak të emigracionit. Por ajo që bëmë ne, vumë në dispozicion, ose vumë si kriter, të gjithë ata që kanë votuar në 1 rast nga 2019 gjer në 2023, pa përjashtim.

Përveç këtyre të gjithë ata të cilët kanë një dokument të PD nga 1990 e gjer sot. Megjithatë, duhet ta pranoj këtu, ka patur mjaft raste që nuk votuan dot. Në një regjistrim të përgjithshëm të partisë, problemi gjyqësor ka qenë një problem serioz, sepse shpërndarja e kartave para problemit gjyqësor, nuk ishte normale, dhe ne u jemi përmbajtur vendimeve.

Kështu që, do të shpërndajmë kartat, do të bëjmë gjithçka që çdo anëtar i PD të marrë kartën e anëtarësisë. Fluiditeti është një realitet, por mendoj se, ndjej keqardhje për ata që nuk janë lejuar të votojnë.

Do të ketë një detyrim, sepse në këto primare ç’është e vërteta, për mendimin tim, vlerësimin tim, duhet të votojnë dhe mbështetësit e PD. Këta që nuk e mbështesin këtë pikëpamje time, e shtrojnë konkretisht në këtë mënyrë. Dakord, ti thua që të votojnë mbështetësit, por Alfredi merr dhe i sjell 800 punonjës të call center dhe votojnë për tjetrin dhe kështu e përmbys rezultatin.

Tani këto që po them, nuk ka rast konkret, por ca gjëra të ngjashme i kanë këto. Edhe në këtë mënyrë, rezultati nuk mund të ndikohet, në këtë mënyrë. Pse, se ti sjell një masë heterogjene për një qëllim të caktuar dhe ata më pas, mund të jenë elektorat nga më të ndryshmit.

Si zgjidhet kjo. Ata që votojnë mbështetësit, ata marrin kartën e mbështetësit. Dmth, çdo mbështetës PD është i deklaruar si mbështetës dhe ka kartën e mbështetësit, jo të anëtarësisë. Ne do synojmë të shkojmë drejt kësaj, nuk është shumë e lehtë si operacion, por do të përpiqemi që ta bëjmë.

Përndryshe unë jam që mbështetësit të marrin pjesë në primare. Morën pjesë në primaret e kryetarëve të bashkive dhe nuk pat ndonjë problem. Megjithatë në këto primare kanë votuar më shumë se asnjëherë. Në dijeninë time nga 2013 gjer sot kjo është pjesëmarrja më masive.

Në 1 kuti në Paskuqan dhe 1 në Vorë, komisioni ka patur pa rregullsi, të cilat Komisioni i Operacioneve Zgjedhore i ka quajtur të pavlefshme. Në mos gaboj jo vetëm këto, por edhe një në Konispol dhe vendimi i tyre është i padiskutueshëm. Arsyet i dinë vetë, kush të ketë kundërshtime ti kundërshtojë, por i kanë gjetur të parregullta për kriteret e përcaktuara.

Elda Menga, TCH: Sot në mesnatë skadon afati për regjistrimin e koalicioneve. Pse nuk është gati marrëveshja politike me aleatët dhe ku kanë ngecur negociatat.

Sali Berisha:  Nuk ka ngecje të negociatave me aleatët. Negociatat ecin mirë, marrëveshja do dorëzohet në mesnatë.

Elda Menga, TCH: Mund të na zbardhni para kohe se cilat janë zonat që kërkojnë aleatët …

Sali Berisha: Është në vazhdim e sipër, por nuk ka ngecje. Jo, nuk ka ngecje.  Probleme të mëdha nuk kemi, megjithatë do shohim fundin.

Elda Menga, TCH: Me Idrizin …

Sali Berisha: Janë në negociata, vazhdojnë negociatat.

Andon Kello, AbcNews: Dua të ju pyes për modelin e primareve që ju zbatuar. Çfarë vlere ka që një kandidat në primare të dalë më i votuari, ndërkohë ju në një qark mund ta keni listën e mbyllur totalisht. PSh, Tiranën, sa vende të hapura ka Tiranë për më të votuarit e primareve.

Sali Berisha: Primaret kanë vlerë shumë. E para nuk është tamam ajo që thonë, lista e mbyllur nuk përjashton ata që morën më shumë, mund të ndodhë, por nëse ndodh në Tiranë, nuk ndodh në qarqe të tjera.

Pra, unë gjykoj se vlera e parë e madhe e primareve është të bësh një listë të hapur dhe transparente. Kjo është, por është vlerë e jashtëzakonshme. Dhe u garantoj se është 100 herë më e mirë se lista që mund të formuloja unë me bashkëpunëtorët e mi.

Kështu që në këtë aspekt ajo shërben shumë si orientues, si kriter. Pastaj, aty ndërhyjnë përcaktime statusore, ato respektohen. Kuotat për rininë dhe gruan do respektohen, pa ato nuk mund të dalë lista.

Nuk u bë me eliminim siç u bënë njëherë këto primaret. Ai nuk ishte model, ai ishte model i kryetarit, ai nuk shërben. Urdhëro ja ku i keni, ka qenë vendimi që të publikohen të dhënat të gjitha siç janë.

Mariglen Kume, MCN: Në listën e primareve të Tiranës, e kanë kaluar pragun 23 kandidatë, ndërkohë që duhet të jenë, 37 kandidatë. Pjesa tjetër të cilët nuk plotësohen nga do ti gjeni, që do ti vendosni.

Sali Berisha: E drejtë pyetja. Mund të kalonin pragun edhe 38 kandidatë, problemi është se në listën e Tiranës, edhe në të hapurën, aleatët do kenë kandidatë.

Dhe jemi të detyruar t’u lëmë në listën e hapur vende edhe partive aleate. Jo të gjithë pjesën. Pastaj se si veprohet aty, nga lista merret, ulet pragu. Është përcaktuar një formulë, mënyrë tjetër nuk ka. Kanë zgjedhur një formulë.

Por vendet për aleatët janë se aleatët kanë kërkuar që të kenë përfaqësues në listat e hapura.

Ardit Hoxha, EuroNews: Ka disa kandidatë në procesin e primareve që janë shumë larg me votat që kanë marrë nga pragu që ka pasur cilido qark, janë shumë poshtë pragut. Për këta kandidatë në mënyrë përfundimtare hiqet mundësia për të qenë në listë, apo mund të përfitojnë nga kriteri i mbështetjes së kauzës së partisë.

Sali Berisha: Sigurisht vlerësimi për ata që kanë kontribuar ekziston, nuk mund të mohohet.

Por vendosja apo jo në listën e hapur, edhe në listën e mbyllur, përcaktohet nga disa kritere dhe jashtë ndërhyrjes së këtyre kritereve, nuk do ketë ndikime të tjera.

Osman Stafa, News24: Të gjithë ata të cilët nuk janë kualifikuar në primare, skualifikohen nga gara për të qenë deputetë?

Sali Berisha: Ata që nuk kanë arritur pragun, sigurisht preferencën e kanë ata që arritën pragun, kjo nuk ka diskutim.  Por pragu nuk është një kusht ‘sin equanon’ për të qene ose jo në listë, sepse mund të zbresë në varësi nga kriteret që thashë më sipër, se edhe ky që është mbi prag, mund të zbresë nën prag pastaj. Nuk merret dot.

Sikundër thamë numrin e kandidatëve që duhen në listën e hapur. Absolutisht sa vende mbeten bosh, do merren nën prag, nëse nuk plotësohen me pragun do të merren nën prag. Pra, pragu është një kriter…

Osman Stafa, News24: Përveç primareve, kryesia e PD do të ketë propozime të veta.

Sali Berisha: Jo. Përveç primareve, kryesia e PD në princip nuk do ketë propozime të veta. Por kryesisë nuk mund t’ia mohosh të gjithë drejtën. Unë mendoj se kryesia ka detyrë të mbrojë parimet e statutit.

Ky është mendimi im, por ai është një forum i lirë që mendime mund të shprehin dhe do diskutohen. Por jashtë kësaj praktike, njerëz që nuk janë futur në primare, shumë e vështirë, por kurrë mos thuaj kurrë.

Elda Menga, TCH: Kur do e keni marrëveshjen me aleatët, në momentet e fundit, e pse nuk i bëni publike disa nga kërkesat që mund të jenë zgjidhur me disa aleatë dhe ku është ngërçi me Shpëtim Idrizin.

Sali Berisha:  Unë ju garantoj që ajo marrëveshje (me aleatët) para jush, natyrisht po qe se ora është e papërshtatshme do të zgjidhet një orë e përshtatshme për tu paraqitur para jush…

Elda Menga: Mbaron afati i KQZ-së…

Sali Berisha: Afati mbaron për KQZ, po ju nuk jeni KQZ.

***

Edhe njëherë, mirënjohje të pakufishme të gjithë shqiptarëve jashtë vendit, të cilët e shndërruan këtë vit të bekuar në vitin e diasporës shqiptare, në vitin e një kontributi historik të anëtarëve të kësaj diaspore në shpëtimin e Shqipërisë.

11 maji është dita e shpëtimit të Shqipërisë.

Ndaj dhe ftoj që këto pak orë që kanë ngelur, këto kohë që kanë ngelur, të shfrytëzohen për regjistrime masive.

Sikundër ftoj të gjithë demokratët të kontaktojnë çdo të regjistruar, të ulen me të, pavarësisht se është regjistruar nga patronazhistët, ky sekt pa të ardhme, që t’i bindin të bashkohen me shumicën, të jenë edhe ata firmëtarë të vitit 2025 si viti i diasporës dhe i shpëtimit të Shqipërisë.

Falënderoj edhe njëherë të gjithë kandidatët, të gjithë anëtarët e PD, falënderoj të gjithë drejtuesit e qarqeve dhe degëve, komisionin e administrimit të proceseve zgjedhore për punën shumë të mirë që bënë në procesin zgjedhor më demokratik, më të plotë, më të mirë në historinë politike të partive në këtë vend.