Viti i ri shkollor, Mziu: 50% e fëmijëve nuk shkojnë sot në kopsht, mungojnë edukatore

Kryetari i Bashkisë Kamzë, Xhelal Mziu nga shkolla “Azem Hajdari” në Babrru-Qendër ka uruar fillimin e vitit të ri shkollor, i cili edhe këtë vit i gjenë çerdhet, kopshtet dhe shkollat të papërgatitura përveç se me mungesë të ambienteve edhe pa personel, si pasojw e trajtimit diskriminues nga ana e Ministrisë së Arsimit, Sporteve dhe Rinisë.

“Përveç mungesës së ambienteve shtesë si ndërtimi i shkollave, kopshteve dhe çerdheve që janë të nevojshme, sërish edhe për ato institucione aktuale të dijes dhe edukimit mungon personeli i duhur. Pavarësisht kërkesave të Bashkisë Kamëz, Ministria e Arsimit dhe qeveria e “Rilindjes” me Ramën Kryeministër as e ka vënë ujin në zjarr për t’iu përgjigjur kërkesave të kryetarit të Bashkisë Kamëz për shtesë personeli.”

Ministrja Lindita Nikolla nuk i është përgjigjur as kërkesës së Bashkisë Kamzë për edukatore, dhe sot në mungesë të tyre, 50% e fëmijëve nuk shkojnë në kopsht.

“Ky diskriminim që ministria dhe qeveria i bën Kamzës është i papranueshëm dhe i patolerueshëm, një pjesë e mirë e shkollave dhe kopshteve nuk kanë fare ose kanë mungesë personeli. Mungojnë: 95 edukatorë kopshtesh, 19 sanitare shkollash, 33 roje, 25 mirëmbajtës, pra në total 172 personel shtesë,” tha I shqetësuar kryetari I Bashkisë Kamzës, Xhelal Mziu për situatën e krijuar dhe diskriminim ekstrem të Qeverisë së Edi Ramës.