Vizitat në veri kundër askujt, Kurti: Në komunat veriore po bëhen investime që nuk janë bërë për dy dekada
Kryeministri i vendit, Albin Kurti, në mbledhjen e Qeverisë ka thënë se
Vizita e djeshme në veri nuk është kundër askujt, por përkundrazi është domosdoshmëri për kuptimin e nevojave të qytetarëve, tha Kryeministri Albin Kurti në mbledhjen e Qeverisë së Kosovës, duke e bërë të ditur se atje po bëhen investime që nuk janë bërë qe dy dekada ndërsa po shtohen shërbimet që i kanë munguar qytetarëve.
“Vizitat tona të zyrtarëve shtetëror në këto komuna nuk janë kundër askujt, ato janë të domosdoshme për të kuptuar nevojat që këto komuna i kanë, pasi të kemi lënë anash çfarëdo paragjykimi për të cilën qeveria jonë angazhohet nga dita e parë. Pikërisht për t’i flakur paragjykimet e ndërsjella dhe për të parë se sa anash janë lënë qytetarët atje, ne po i bëjmë këto vizita pune.
Atje po bëhen investime që nuk janë bërë qe dy dekada, po shtohen shërbimet që i kanë munguar qytetarëve,” tha Albin Kurti pas vizitës në fshatrat e Leposaviçit dhe komunën e Mitrovicës së Veriut, duke sqaruar se Qeveria e Kosovës nuk po mbyll, por po hap zyre të cilat ofrojnë shërbime të ligjshme.
“Pas raportimeve se në katër komunat veriore strukturat paralele po zhvillonin veprimtari ilegale, institucionet e sigurisë kanë marrë veprime ligjore për lirimin e tyre… kjo na ka mundësuar që të ofrojmë shërbime të ligjshme. Në ato objekte do të funksionalizohen njësia për patentë shoferë, qendra për punë sociale, shërbime të mirëqenies sociale, shërbimi për regjistrimin e automjeteve e shërbime të tjera të Ministrisë së Ekonomisë. Qeveria nuk po mbyll zyre, përkundrazi po hap, nuk po kufizon shërbimet, po i shton ato, nuk po i largon shërbimet publike nga qytetarët, po i afrojmë. Kësisoj duhet të shihen veprime tona në veri.”
Se kush është për mbyllje, tha Kryeministri i Kosovës, u pa javën e kaluar ndërsa ka falënderuar zyrtarët policorë për punën që po bëjnë kundër planeve të këqija, që Kurti tha se nuk shihen e as nuk diskutohen në publik.
“Grupe e persona të maskuar në prani të policisë së Serbisë, në kufi me Republikën e Kosovës por në territor të Serbisë, bënin rolin e policit kufitar duke ndaluar vetura e udhëtarë për të kuptuar përkatësinë e tyre etnike. Gjatë atyre ditëve, policia dhe inteligjenca nga minuta në minutë kanë punuar që planet dhe qëllimet e tyre të dështojnë, siç edhe ndodhi.”
Në fund, Kryeministri i Kosovës, Albin Kurti, ka përmendur dhe 12 vjetorin e përfundimit të mbikëqyrës ndërkombëtare të pavarësisë së Kosovës, teksa e ka cilësuar Republikën e Kosovës si triumf të demokracisë, ligjshmërisë dhe të drejtave të njeriut.
“Ne jemi mirënjohës mbështetjes së miqve dhe aleatëve tanë, atyre 25 shteteve në kuadër të grupit ndërkombëtar mbikëqyrës dhe jemi krenar për kuadrin e fortë institucional që gëzon vendi ynë si rezultat i përpjekjeve të përbashkëta.”
