Vizitë zyrtare në SHBA, Kandidati për Kryeministër i PDK: Prezantova vizionin dhe planin tim

Kandidati për kryeministër i Partisë Demokratike të Kosovës, Bedri Hamza, po zhvillon një vizitë zyrtare në Shtetet e Bashkuara, ku në takim me zyrtarët amerikanë po prezanton vizionin dhe planin tij për lëvizjen sa më shpejt përpara drejt zhvillimit ekonomik, investimeve kapitale dhe rritjes së mirëqenies së qytetarëve.

Vizitën e tij zyrtare në Shtetet e Bashkuara, Bedri Hamza e filloi me një takim me Asistentin Special të Presidentit Biden, që njëherësh është Drejtor i Lartë për Evropë në Këshillin për Siguri Kombëtare, Michael Carpenter, si dhe Drejtoreshën për Ballkan dhe Evropë Qendrore, Kathleen Larkin.

“Mesazhi që mora ishte i qartë: SHBA qëndrojnë pranë nesh dhe mbështesin pavarësinë, sovranitetin dhe integritetin territorial të Kosovës.

Ne u pajtuam që tani është koha për progres në konsolidimin e Kosovës drejt njohjes nga pesë shtetet anëtare të BE-së, të cilat ende nuk e kanë njohur pavarësinë e Kosovës, drejt sigurimit të udhërrëfyesit për anëtarësim të Kosovës në Partneritet për Paqe dhe përfundimisht në NATO e BE,” u shpreh Bedri Hamza përmes rrjetit social Facebook duke fol për qëllimet strategjike për të cilat folën gjerësisht.

“Unë prezantova shkurtimisht vizionin dhe planin tim që Kosova të lëvizë më shpejt përpara drejt zhvillimit ekonomik, rritjes së pagave në sektorin publik, investimeve kapitale dhe rritjes së mirëqenies së qytetarëve,” u shpreh kandidati për Kryeministër i Partisë Demokratike të Kosovës, Bedri Hamza, duke përfunduar:

“Për realizimin e të gjitha këtyre qëllimeve, partneriteti me SHBA është i rëndësisë jetike dhe për Kosovën e mua edhe i pazëvendësueshëm.”