Vjedhja e dyshes Rama-Balluku me rrugët, Berisha: E pandalshme!

Të pandalshme, e vlerësoi Kryetari i Partisë Demokratike, Sali Berisha, vjedhjen që dyshja Rama-Balluku po bën në rrugët e vendit ndërkohë foli dhe për disnivelin ekonomik i cili, sipas tij, u krijua me qëllim plaçkitjen e taksapaguesve shqiptarë.

Ndërkohë për manipulimin që Bordi i Edi Ramës po bënë me çmimin e naftës, Kryetari i PD tha se ai është 50 për qind më i lartë se ai i bursës, dhe si naftën, ashtu dhe qumështin, bukën, vajin, Kryeministri Rama po i përdor për pasurimin e tij dhe të klientelës së tij, dhe varfërimin e qytetarëve shqitparë.

“Është e pandalshme vjedhja që dyshja Rama-Balluku po bën në rrugët e vendit. Ndërtimi i rrugës Qukës-Qafë Plloçë kakaluar çdo afat kohor në historinë e vendit. 43 kilometra rrugë vazhdojnë prej 13 vitesh. Punimet për këtë rrugë kanë filluar në vitin 2009. Rruga u prokurua për ndërtim me një tender ndërkombëtar me 73 milionë euro.

Me ardhjen në pushtet të Edi Ramës, me një akt absurd, ai vendosi të anulonte ndërtimin e rrugës, pasi traseja ishte shtrirë në 10-12 kilometra, pasi financimi ishte i garantuar nga bankat e huaja. Por ai nuk realizoi dot këtë bllokim, pasi detyrimet e Shqipërisë nga anulimi i kontratave do ndëshkonin vendin. Rruga që duhej të përfundonte në vitin 2014, vazhdon edhe në vitin 2022 dhe nuk ka shanse të përfundojë as këtë vit.

Kostoja e rrugës Qukës- Plloçë është trefishuar! Çfarë ka ndodhur?! Nga 73 milionë që ishte fondi i prokuruar, gjer sot janë shpenzuar për ndërtimin e saj 225 milionë euro. Një rrugë që kalon në një territor jo shumë të vështirë, të jemi realistë. Të pjerrët, por jo të vështirë. Pa vepra madhore arti, tunele apo ura të gjata apo akuadukte të gjata. Është mbi trefishuar shpenzimi.

Zhvillimi më i fundit me rrugën Qukës- Qafë Plloçë është ky: Në Trebinjë, lotet që ndërtoheshin në drejtim të njëri-tjetrit, na dalin në një disnivel prej 17 metrash. Tani ju duhet të dini se në rrugë që ndërtohen mbi sipërfaqen e tokës, kjo ndodh vetëm me qëllim. Nuk mund të ndodhë kurrë pa dashje. Rruga nuk projektohet nga kompanitë që e ndërtojnë, por nga kompanitë e projektimit. Projekti i rrugës shqyrtohet në çdo detaj nga Ministria e Punëve Publike,” tha Sali Berisha në konferencën e përjavshme duke sqaruar se kur fillon zbatimi i projektit nga firma ndërtuese, ky zbatim mbikëqyret nga supervizori që përzgjidhet nga kompania dhe ministria.

Por, nga doli ky disnivel ekonomik?! Sipas Berishës, ky është një disnivel i krijuar me qëllim që të plaçkiten taksapaguesit shqiptarë dhe është një akt kriminal që edhe rrugën e bënë qesharake.

“10 ditë më parë, Edi Rama njoftoi se janë marrë 50 milionë euro të tjera borxh, faktikisht për vazhdimin e kësaj rruge, për shkak të disnivelit, sepse disniveli prej 17 metra është shumë i madh dhe kjo kërkon stërzgjatje, zhvlerëson rrugën shumë, e zhvlerëson kategorinë e rrugës pasi është aks kombëtar. Ky akt kriminal e bën rrugën qesharake. Tani duhet ta zgjasin dhe ta stërzgjasin derisa të pucen lotet në Trebinjë. Këto nuk janë aksidente.

Këto nuk mund të jenë kurrë rastësore, këto janë mekanizma vjedhje të taksapaguesve shqiptare. Është rrugë në sipërfaqe. Sot edhe tunelet me teknologjitë e reja, edhe metrotë, edhe ndërtimet nëntokësore, përjashtohet tërësisht mundësia e disniveleve. Në rrugë sipërfaqësore kjo u ndodh Edi Ramës dhe Belinda Ballukut se duan të mbushin thasët. Natyrisht janë të qetë se drejtësinë e kanë në thes, SPAK e kanë të partisë, por i garantoj se drejtësia nuk do të heshtë,” Kryetari i PD duke folur edhe për rrugën Kardhiq-Delvinë e cila nisi me 710 mijë euro loti i parë dhe përfundoi me 3.2 milionë euro kilometri.

Në fund, i pashmangshëm në këtë konferencë të përjavshme të Kryetarit të PD ishte dheh çmimi i naftës. Ai akuzoi Bordin e Ramës i cili e ka çmimin e naftës 50 përqind më të lartë se në bursë. Dhe jo vetm kaq!

“Naftën, qumështin, bukën, vajin, Edi Rama po i përdor për dy qëllime madhore, pasurimin e tij dhe të klientelës së tij, varfërimin e qytetarëve shqitparë. Dje nafta ka qenë, ka disa ditë që nafta në bursë është nën çmimin që ka pasur para luftës në Ukrainë, kjo jo rastësisht, sepse presidenti Joe Biden urdhëroi hapjen e rezervave të naftës në SHBA,” tha Kryetari i PD, Sali Berisha, duke përfunduar:

“Përgjysmimi i akcizës së naftës do jetë një nga masat që do ndërmarrë qeveria e ardhshme. Jo vetëm kaq, por edhe subvencionimi i biletave të transportit urban dhe interurban. Sot ky bord që mbron interesat e Edi Ramës dhe klientelës së tij, cakton një çmim të paktën 50 përqind më të lartë se ai i bursës. Në SHBA, çmimi ka zbritur në 1 dollarë, madje edhe më poshtë, kurse në Shqipëri, vazhdon në nivelet më të larta në botë.”