Vjedhja e shekullit, Berisha: Erion Veliaj, padroni i djegësit të Tiranës!

Erion Veliaj po bën presion të madh edhe në sistemin e drejtësisë ndërkohë ka mobilizuar të gjitha potëncialet e tij mediatike dhe të tjera, dhe kërkon me çdo kusht të paraqitet si viktimë e Klodian Zotos dhe Mirel Mërtirit. Kështu u shprehë sot Kryetari i Partisë Demokratike, Sali Berisha, duke siguruar se Erion Veliaj është përgjegjës si njeriu kryesor i inceneratorit të Tiranës.

“As Klodian Zoto, as Mirel Rama, pra Edi Rama, nuk mund të vendoste dhe t’i diktonte një vendim të tillë Kryetarit të Bashkisë së Tiranës pa shkelje të rëndë të Kushtetutës dhe ligjeve të vendit. Erion Veliaj, përveç përmbysjes së strategjisë, ka patur rol kryesor në dhënien me koncension privat të djegieve të mbejteve të Tiranë,” tha Sali Berisha duke shtuar se ndryshon në mënyrë substanciale nga Fieri dhe Elbasani, të cilat ishin prokurime publike të objekteve me çelësa në dorë.

“Erion Veliaj është arkitekti i djegësit prej 128 milionë eurosh, i cili duhet të ndërtohej i tëri me paratë e koncensionarit, por që më vonë u kalua se do të ndërtohej me paratë taksapaguesve shqiptarë, dhe në 30 vite do t’i paguanin kompanisë së Erion Veliajt, djegësit të Tiranës, nga 680 milionë në 750 milionë euro,” tha Kryetari i PD, Sali Berisha duke përfunduar:

“Çfarë fshihet prapa këtyre fakteve? E sigurtë është që fshihet një veprimtari kriminale e Erion Veliajt. Për të gjitha ata që janë të interesuar që ky problem të zbardhet deri në fund, unë deklaroj se një kusht i tillë mund të plotësohet në rast se Alqi Bllako, ose Etleva Kondi merren si të penduar të drejtësisë.”

Deklaratë:

Mirëdita!

Erion Veliaj ka mobilizuar këto kohë të gjitha potëncialet e tij mediatike dhe të tjera, dhe kërkon me çdo kusht të paraqitet, ose si viktimë, ose së paku si myshteri i Klodian Zotos dhe Mirel Mërtirit.

Në këtë kuadër burime të ndryshme shprehen se ai po bën presion të madh edhe në sistemin e drejtësisë. Dua të theksoj që në fillim se këto qendrime përbëjnë vepër të re të veçantë penale, për të cilat ai do të bëhet përgjegjës deri në një krahas përgjegjësive të rënda ligjore dhe penale që mban si njeriu më kryesor i djegësit të Tiranës.

Të pretendosh se je viktimë, apo më së paku myshteri i ustallarëve Zoto dhe Mërtiri, do të thotë të tallesh jo vetëm me veten tënde, por me drejtësinë dhe mbarë publikun shqiptar. Është Erion Veliaj padroni i djegësit të Tiranës, i cili për të çelë dyert e aferës e vjedhjes së shekullit ndryshoi strategjinë e trajtimit të mbetjeve, nga strategji depozitim, seleksionim, riciklim dhe zgjerim i landfillit në djegie me koncension me inceneratorin e Tiranës.

Askush, as Klodian Zoto, as Mirel Rama, pra Edi Rama, nuk mund të vendoste dhe t’i diktonte një vendim të tillë Kryetarit të Bashkisë së Tiranës pa shkelje të rëndë të Kushtetutës dhe ligjeve të vendit.

Erion Veliaj, dua të them këtu se përveç përmbysjes së strategjisë, ka patur rol kryesor në dhënien me koncension privat të djegieve të mbejteve të Tiranë. Gjë që ndryshon në mënyrë substanciale nga Fieri dhe Elbasani, të cilat ishin prokurime publike të objekteve me çelësa në dorë.

Erion Veliaj është arkitekti i djegësit prej 128 milionë eurosh, i cili duhet të ndërtohej i tëri me paratë e koncensionarit, por që më vonë u kalua se do të ndërtohej me paratë taksapaguesve shqiptarë, dhe në 30 vite do t’i paguanin kompanisë së Erion Veliajt, djegësit të Tiranës, nga 680 milionë në 750 milionë euro.

Janë përfaqësuesit e Erion Veliajt në komisionin e dhënies së koncensioneve që kanë luajtur rol përcaktues në dhënien e bonusit prej 8 pikësh, sipas porosisë së Erion Veliajt. Një kompani që nuk ekzistonte kund mbi dhe, përveçse në kokë e Erion Veliajt.

Është Edi Rama, Agaçi, Erion Veliaj, pra autorët e bonusit famëzi të një ndërmarrje që nuk ekzistonte. Është Erion Veliaj që me 5 shkresa radhazi ka insistuar nëpërmjet Alqi Bllakos pranë Ministrisë së Financave për leverdishmërinë e djegësit të Tiranës, apo djegësit të Veliajt.

Katër herë me rradhë kjo kërkesë është refuzuar nga Ministria e Financave. Herën e pestë është pranuar, por pasi Erion Veliaj ka paraqitur një vendim të falsifikuar në emër të Këshillit të Qarkut të Tiranës, pra të gjitha bashkive të qarkut, se ato do mbulojnë me shpenzimet e tyre djegësin e Tiranës.

Është Erion Veliaj, jo viktimë, apo myshteri i ustallarëve Zoto-Mërtiri, por padron i djegësit të Tiranës, ai që ka marrë përsipër në emër të Këshillit Bashkiak, dhe ka firmosur në emër të Këshillit Bashkiak në kundërshtim me Kushtetutën dhe ligjin, se Bashkia e Tiranës do të paguante 91 milionë euro në vit për djegësin e Erion Veliajt.

Është Erion Veliaj personi që u ka marrë për për 6 vite me radhë qytetarëve të Tiranës tarifën 29 euro për ton mbetjesh pa djegur një kilogram të tillë, dhe ky është një akt shumë i rëndë.

Janë paguar për çdo ton mbetje 18 euro mbi tarifën e zakonshme që i takonte për depozitim, seleksionim, etj. Është Erion Veliaj që ka tatuar me 60 milionë euro ndërtuesit e Tiranës, duke i detyruar ata me një polici të trefishtë, Policinë e Shtetit, policinë e tij bashkiake, dhe policinë private të Agron Malajt, që të mos mund të dilte asnjë kosh dhé nga Tirana, por të shkonin të gjitha dherat dhe inertet në Sharrën e Tiranës.

Është Erion Veliaj, i cili ka toleruar lojën me ndryshimin e pronarëve, me vetëdije të plotë.

Këtu unë jam për t’i informuar shqiptarët, se në vitet 2020, 2019, Bruno Presezzi, Franko Tosi kanë ardhur me çarter, jo një, por disa herë dhe kanë takuar Erion Veliajn.

Sipas një burimi tjetër, që ky i fundit duhet verifikuar, ata një udhëtim të tillë e kanë bërë edhe para 3 muajsh po me çarter dhe janë larguar nga Shqipëria.

Çfarë fshihet prapa këtyre fakteve? E sigurtë është që fshihet një veprimtari kriminale e Erion Veliajt.

Së fundmi, për të gjitha ata që janë të interesuar që ky problem të zbardhet deri në fund, unë deklaroj se një kusht i tillë mund të plotësohet në rast se Alqi Bllako, ose Etleva Kondi merren si të penduar të drejtësisë.

Unë këto kisha për sot, nesër do keni informacione të tjera më të gjera.

Faleminderit!