Vjedhje gjeopolitike!
nga Agim Popoci
Vjedhje Intelektuale, shqiptarët po kryenin çdo ditë me shumë lehtësi edhe si zyrtarë të lartë, ashtu siç kishin bërë edhe paraardhësit e tyre nga viti i zi 1945, por, nuk e dinin se ishte aq intelektuale të vjedhësh paratë e shtetit deri sa e licencoi këtë titull dora vetë, kreu i SPAK, Altin Dumani!
Por, një valë e re vjedhjesh nga pushteti i Edi Ramës, që paradoksalisht u rrit me themelimin e Prokurorisë së Posaçme Kundër Krimit të Organizuar dhe Korrupsionit, SPAK, u shoqërua me sqarimin e miletit nga kokat e propagandës komuniste të Sigurimit të Shtetit, se nuk kemi të bëjmë me vjedhje të rëndomta, as intelektuale, por, për vjedhje gjeopolitike!
Mirë, vjedhjet e zbuluara të kohëve të fundit nuk janë të rëndomta sepse nuk bëhen në mënyrë aq të pakujdesshme si me Fondet e BE ose koncesionet në Shëndetësi, nuk janë as vjedhje intelektuale si me inceneratorët ose në Bashkinë Tiranë nga drejtorët dhe vetë Kryetari, por, ta quash vjedhjen në Tunelin e Llogarasë si vjedhje gjeopolitike vetëm pse cenon rrëzimin e “mbretëreshës”, që vlerësohet nga këto koka edhe si hapi i fundit drejt rrëzimit të “mbretit”, tejkalon çdo imagjinatë që pritet të prodhojë një kokë komuniste ndonëse freskohet me lemonadën e Lajthizës dhe financohet për të prodhuar arsyetime edhe kur këto vjedhje prej dhjetëra miliona eurove bëhen hapur!
Që laboratori propagandistik i Sigurimit të Shtetit kujdeset për të mbrojtur moralin dhe politikën e Edi Ramës, kjo nuk është asgjë e re edhe sot kur dëgjohet vringëllima e prangave për Belinda Ballukun, por, kur një kavje e këtij laboratori thotë se me mbrojtjen e Ballukut mbrohet një parim, sepse gjeopolitika është kompetencë e Kryeministrit dhe nuk mund të gjykohet me rregulloren e prokurimit publik, kalon çdo imagjinatë shqiptare që mund të ketë për shërbëtorët e Edi Ramës ose dhe UDB-së në Tiranë!
Këtu çalon dhe e vërteta që mundohet të dalë nga Tuneli Llogarasë, Erdogani, Bechtel Enka, Amerika etj. pasi është zier në kazanin e gjeopolitikës, nga Edi Rama me dorën e Baton Haxhiut, i cili pa i lëvizur qerpiku flet dhe për parimin!
Sikur Edi Rama me partinë e tij sa ishte në opozitë nuk do të sulmonte dhe akuzonte investimin më strategjik të kohës, Tunelin e Kalimashit dhe Rrugën e Kombit, për korrupsion prej 230 milionë euro, që kishte po këta protagonist që thekson Rama me gojën e Batonit, Erdogani, Bechtel Enka, Amerika etj. sot gjërat do të ndryshonin!
Do të ndryshonin edhe përkundër faktit që Edi Rama me partinë e tij në kohën e këtyre akuzave sa ishte në opozitë, mbahej mirë nga banka turke BKT, dhe, sot është sekret publik se është hambar i mirë i votave dhe patronazhistëve, me administratë socialiste që ka kjo Bankë!
Do të ndryshonin, pavarësisht akuzës së drejtëpërdrejtë prej 50 milionë eurove të Zv/Kryeministrit dëshmitar për kontraktimin e Tunelit të Llogarasë, Arben Ahmetaj, sepse parimi që gjeopolitika është kompetencë e Kryeministrit dhe nuk mund të gjykohet me rregulloren e prokurimit publik, tashmë do të mbizotëronte ndër shqiptarë si argument i zbatuar edhe nga qeverisja e kaluar!
Por, sot, kur në tokën shqiptare projekti me prioritet gjeopolitik është Autostrada Milot-Hani Hotit për tu lidhur me Austradën Podgoricë-Dubrovnik-Split-Trieste, nuk ndërtohet sepse është në Veri, ndërsa Tuneli i Llogarasë aspak gjeopolitik por gjeostrategjik vetëm për biznesin e Samir Manes, Green Coast, përveç se u ndërtua dhe shërbeu edhe për vjedhje jo ekskluzivisht të Belinda Ballukut, gëzon dhe mbrojtje nga laboratori propagandistik i Sigurimit të Shtetit përballë SPAK-ut që Edi Rama thotë se vetë e krijoi, duke e arsyetuar vjedhjen si qokë për aleatin Erdogan me pagëzimin, vjedhje gjeopolitike, situata ndryshon me një detaj që nuk është i vogël!
Sot, derisa analisti serb Dushan Janjiç kur dëshiron ta dijë qëndrimin zyrtar të Presidentit të Serbisë, Aleksandar Vuçiç, e lexon Baton Haxhiun, shqiptarët e kanë pak më të thjeshtë, lexojnë vendimin e Gjykatës Kushtetuese të Shqipërisë!
Sot, ky është dhe shqetësimi kryesor i shoqërisë shqiptare dhe arsyeja pse Edi Rama nuk ndodhet përballë ndonjë sfide morale ose politike ndonëse krimi dhe qeverisja tashmë janë një!
Në fund, kjo është dhe arsyeja pse Edi Rama me vendimin e djeshëm të Gjykatës Kushtetuese për Erion Veliajn i është lehtësuar fusha e veprimit edhe brenda partisë së tij kriminale, PS, jo vetëm pse e don të lirë dhe në detyrë të vazdoj punën ashtu të akuzuar nga SPAK si hajdut; Sot, kur tashmë është ligjëruar se korrupsioni dhe pastrimi i parave nuk na qenka sipas standardit komunist, krim i rëndë!
