Vjenë, një afgan vranë tre femra

Tre femra janë gjetur të vdekura në një sallon masazhi në Vjenë për të cilin thuhet se ka shërbyer si bordel, ndërsa mendohet se janë ther me thikë, raportojnë mediat austriake.

Në parkun e afërt nga vendi i krimit, policia ka arrestuar të dyshuarin, tha për Agjencinë austriake të lajmeve, APA, zëdhënësi i policisë, Philipp Haßlinger, duke shtuar se i arrestuari kishte gërvishtje me thikë, por nuk ishte në rrezik për jetën.

Sipas “Kronen-Zeitung”, mashkulli në momentin e arrestimit në dorë kishte armën me të cilën ka kryer vrasjet. Ndërsa e përditshmja austriake “Kurier”, raporton se bëhet fjalë për një 27-vjeçar afgan.

Portali austriak “OE24” raporton se viktimat ishin nga Azia, që kanë punuar në bordelon “Asia Studio 126a”. Dëshmitari ka rrëfyer se ka parë gjurmët e gjakut nga lokali deri në rrugë, thuhet në raportin e policisë.

“Kurier” shkruan se policia e ka gjetur afganin 27 vjeçar ndërsa po fshihej në shkurret e parkut afër vendit të krimit.

Në vendin e ngjarjes është thirrë emergjenca, por u konstatua se gratë ishin të vdekura. I dyshuari është dërguar në spital, në repartin e personave të privuar nga liria, ku i janë konstatuar lëndime të lehta.

Sipas hetimeve paraprake, tre gratë ishin personeli i vetëm që ishte në atë objekt në momentin e krimit. Nuk dihet nëse afgani kishte shfrytëzuar shërbimet në bordel ose i ka sulmuar gratë menjëherë me thikë.

Vetëm disa orë para këtij krimi ka ndodhur edhe një vrasje në Vjenë. Nëna 51-vjeçare dhe vajza e saj 13-vjeçare janë gjetur të vdekura, ndërsa mediat raportojnë se bëhet fjalë për një dramë familjare.