Vjosa!
nga Agim Popoci
Prurjet shumë të larta të Vjosës kanë përmbytur në vitet ’60 mijëra hektarë tokë dhe po aq shtëpi, duke shkaktuar shumë dhimbje dhe braktisje të vatrave shekullore, dhe e gjitha u justifikua nga mungesa e argjinaturave. Kur argjinaturat u bënë dhe sërish pati reshje të mëdha shiu në vitet ’90 dhe jo vetëm, Vjosa përmbyti mijëra hektarë tokë dhe shumë shtëpi ngelën nën pushtimin e ujit, u tha se e gjitha ndodhi për shkak të shkatërrimit të argjinaturave nga dora e njeriut!
Këto ditë, kur prurjet e dhimbjeve komuniste përmbytën Parlamentin e Shqipërisë pasi U.D. Presidentja e Kosovës, Vjosa Osmani, u tha disa të vërteta në sy bijve të autorëve të këtyre krimeve, gjithçka doli nga shtrati: krimi, politika, dhe autorët e këtyre krimeve! Dhe, në shënjestër të mediave që menaxhohen nga këta kriminel komunistë, nuk ishin ata që kanë përmbytur në gjak tokën shqiptare, por, Vjosa!
Po, po, Vjosa Osmani!
Askush nga këta papagall komunist nuk tha pse Kryeministri Edi Rama bojkotoi fjalimin e Presidentes së Kosovës! Arsyet mund të ishin të shumta sikur axhenda e Vjosës të mos ishte konsultuar nga rivali i tij politikë, Presidenti i Republikës, Ilir Meta, si mikpritës i Presidentes së Kosovës! Por kur dorën e fundit i jep protokolli në varësi të Kryeministrit, atëherë sjellja e Edi Ramës si në Parlament ashtu dhe në Kryeministri, është kriminale.
Kur kujtojmë vetëm vizitën e Kryetarit të Parlamentit të Sllovenisë, Milan Brglez, në shkurtin e vitit 2016 në Tiranë, dhe temenanë që i bëri Kryeministri Edi Rama, doza e kriminalitetit të sjelljes ndaj Vjosa Osmanit shtohet edhe më shumë!
Pse, si duhej pritur Vjosa Osmani?! Ishte kjo pyetje që shumë nga shërbëtorët e Edi Ramës e bënë si në Tiranë ashtu dhe Prishtinë! Protokollet shqiptare kanë ditur të bastardojnë shumë vizita, por ndoshta nuk është e tepërt të thuhet që Vjosa mund të ishte prit të paktën si Milan Brglezi; Ndonëse ky protokoll tronditi edhe vetë sllovenët për gjithë atë pritje, sepse, siç u shprehën disa kolegë nga Lublana, mbi 90 për qind e qytetarëve të Sllovenisë, as që e njohin Kryetarin e Parlamentit!
Po cila është arsyeja që u hallakatën shkijet e Tiranës që menaxhojnë për fat të keq edhe mediat në Shqipëri?!
Që Beogradi vazhdon dhe sundon në Tiranë, ky nuk është lajm që nga fillimi i luftës së dytë botërore me Bllazho Jovanoviçin si i dërguar i KQ PKJ në Shqipëri.
Por kur vjen një kosovar sot në Tiranë, dhe Edi Rama mendon se i ka nënshtruar që të gjithë, aq më shumë President i Kosovës, dhe u thotë bijve të kriminelëve komunistë në Parlamentin e Shqipërisë, se babain dhe xhaxhain e mamasë i kishin groposur të gjallë komunistët, Isuf Vuçitërnën ata serbë në Vuçitërn të Kosovës, dhe Sylejman Vuçitërnën ata shqiptarë në Kënetën e Maliqit, alarmohen të gjitha instancat!
Pse ishte angazhuar Edi Rama për ndarjen e Kosovës, e tha Vjosa por kjo nuk trazoi njeri madje komunistët e kanë për mburrje; Angazhimi për Mini Shengen i Tiranës zyrtare doli nga goja e Vjosa Osmanit por ky është amanet i Enver Hoxhës nga viti 1946 për të gjithë zbatuesit e saj që kishte përballë në parlament, dhe nuk englendisi asnjërin prej deputetëve të Skenderbeut të Spiropalit; Ndërsa Rezoluta për gjenocidin serb ndaj shqiptarëve në Kosovë, as që u diskutua nga bijtë e atyre që krenohen edhe sot për gjenocidin e baballarëve të tyre ndaj shqiptarëve!
Të gjithë ata që mendojnë se Edi Rama u hallakatë pse prurjet e dhimbjeve të Vjosa Osmanit përmbytën Parlamentin kriminal të Shqipërisë, i cili vazhdon e heshtë mbi krimet komuniste ndaj shqiptarëve të Kosovës, e ka shumë gabim!
Konferenca e Bujanit, Masakra ndaj shqiptarëve të Kosovës në rrugëtimin e tyre drejt Tivarit, burgjet dhe internimet, si dhe ngjarjet gjatë luftës së Kosovës në vitin 1999 janë konservuar me shumë delikatesë nga historianët shqiptarë dhe nuk cenojnë marrëdhëniet në relacionin Shqipëri-Kosovë! Ata që guxuan të flasin, si Bujar Bukoshi dhe Ramush Haradinaj, u bënë afresk në murin e politikës së Tiranës; Madje i tillë u bë edhe Isa Mustafa kur mendoi të flas paksa!
Pse u lejua të gërvishtet plaga e krimeve komuniste në Shqipëri kur zemërimi i tyre po blihet me dëmshpërblim dhe vende pune, kjo është ajo që e zuri të papërgatitur dhe e trazoi Edi Ramën në prag të zgjedhjeve!
Kjo armatë votuesish me familjarë të vrarë nga komunistët dhe të tradhtuar nga pushtetet postkomuniste është shqetësimi kryesor i Kryetarit të PS, Edi Ramës, në prag të zgjedhjeve të 25 Prillit, kur sondazhet janë shqetësuese për regjimin aktual!
Me ndihmën e mediave që financon, ai arriti ta krijoi një perde të hekurt që çon në harresë krimet komuniste, por kur këtë kujtesë e cenon një autoritet si Presidenti i Kosovës, nga një foltore si ajo e Parlamentit të Shqipërisë, për Edi Ramën nuk është asgjë më pak se këmbanë alarmi.
Në fund, nga kjo armatë e mediave të financuara nga komunistët, askush nuk zuri në gojë krimin makabër të vrasjes së Kolonel Sylejman Vuçitërnës edhe pse dëshmitarë të shumtë e mbrojtën në Gjyqin Special. Pse?! Përgjigjen e keni në celularin tuaj, aty ku mbi 800 portale ju përmbytin trurin vetëm me propagandë komuniste! Ose, nëse jeni në shtëpi, merrni pultin dhe ndizni televizionin, e keni kudo: Edi Rama tha…
