Vjosa Osmani dhe Albin Kurti vlerësojnë veprën e Presidentit Rugova

Presidentja, kryeministri dhe ambasadorë të vendeve të perëndimit të akredituara në Kosovë kanë bërë sot homazhe në 17 vjetorin e vdekjes së Ish-Presidentit të Kosovës, Ibrahim Rugova. Me këtë rast, Vjosa Osmani dhe Albin Kurti kanë vlerësuar lartë veprën e Presidentit Rugova dhe për ndërkombëtarizimin e çështjes së Kosovës.

“E përkujtojmë me mall, njeriun i cili i dha zë kërkesave të drejta të popullit të Kosovës, për liri dhe pavarësi. Natyrisht që është pikërisht trashëgimia që ai la pas që na shërben si dritë udhërrëfyese në përpjekjet tona të pa ndalura që ta forcojmë shtetin tonë, shtetin që u ndërtua me aq shumë mund dhe sakrificë të shumë burrave e grave të Republikës së Kosovës prandaj ashtu siç diti Presidenti Rugova, të ndërtoj miq e aleatë të cilët e mbështetën Kosovën në ditët më të rënda dhe më të errëta të saj, ashtu do t’i ruajmë këto aleanca edhe në rrugën tonë përpara për derisa Kosova vazhdon të përballet me sfida,” tha Presidentja Vjosa Osmani në këtë përvjetor ndërsa Kryeministri Albin Kurti tha se Presidenti Ibrahim Rugova do kujtohet për qëndrimin intelektual, kombëtarizimin e rezistencës civile dhe ndërkombëtarizimin e çështjes së Kosovës.

“Bashkë me Presidenten e Republikës së Kosovës vendosëm lule të freskëta dhe bëmë homazhe në Prishtinë te varri i Presidentit Ibrahim Rugova, presidentit të parë të Republikës së parë të Kosovës dhe Presidentit të parë të Kosovës së çliruar. 21 janari është ditë e ftohtë dhe është një ditë teksa e kujtojmë Presidentin Ibrahim Rugova, për qëndrimin intelektual, për sjelljen paqësore, për qasjen humaniste, për ndërkombëtarizimin e çështjes së Kosovës dhe për kombëtarizimin e rezistencës civile.”

Ndërsa Kryetari i Lidhjes Demokratike të Kosovës, Lumir Abdixhiku, tha se Ibrahim Rugova la gjurmë në shtetësinë e Kosovës.

“Gjurmët e tij, trashëgimia e tij politike vazhdon të mbetet qenësore për ne dhe politikën e Kosovës. Ibrahim Rugova ishte prijësi unik i lëvizjes nacionale të shqiptarëve dhe përpjekja e tij për liri, pavarësi dhe demokraci është suksesi më i madh historik i shqiptarëve,” tha Abdixhiku pas homazheve duke përfunduar:

“Sot ndjejmë mungesën e tij, urtësisë së tij, politikës së tij dhe vizionin e tij për një Kosovë demokratike një Kosovë që është e ndërlidhur ngushtë në rrugëtimin euroatlantik në përpjekjen e saj kolektive drejtë së ardhmes.”