Vjosa Osmani e Stevo Pendarovski, kritika “Ballkanit të Hapur”

Presidentja e Kosovës, Vjosa Osmani, dhe Presidenti i Maqedonisë së Veriut, Stevo Pendarovski, pas takimit në Prishtinë shprehën sërish kritika nga këndvështrime të ndryshme për iniciativën “Ballkani i Hapur” ndërsa folën për raporte të mira fqinjësore në mes të dy vendeve.

Presidentja e Kosovës tha se “Ballkani i Hapur” nuk u ndërtua mbi parimet themelore të bashkëpunimit ndërfqinjësor ndërsa hoologu i saj maqedon shtoi se kjo iniciativë nuk mund të ketë sukses përderisa në të nuk janë të përfshira të gjitha vendet e Ballkanit Perëndor.

“Ballkani i Hapur” , tha Vjosa Osmani, nuk e pranon trajtimin e barabartë të gjashtë shteteve të Ballkanit Perëndimor.

“Përderisa Serbia nuk e trajton Kosovën mënyrë të barabartë në iniciativa rajonale, atëherë shohim se Serbia do zgjerim të interesave të saj hegjemoniste. Kosova ka rezerva të mëdha sa i përket aspekteve politike të kësaj iniciative, por edhe sa i përket ekonomisë e sigurisë sepse synimi është të përdoret njëfarë paradhome që të zvarritet procesi e integrimit evropian,” tha Presidentja e Kosovës derisa Presidenti i Maqedonisë së Veriut, Stevo Pendarovski, shtoi se “Ballkanin e Hapur” e ka parë me dyshime qëkur është lançuar më 2019 ndonëse vjen nga shteti që sot është pjesë e kësaj nisme së bashku me Serbinë dhe Shqipërinë.

“T’ua rikujtoj se kur nisi si iniciativë në vitin 2019, unë isha politikani i parë që shpreha rezerva. Kësaj iniciative i mungon diçka, në vend se të jenë gjashtë shtetet, janë vetëm tre. Derisa kjo iniciativë nuk i përfshin të gjitha shtetet nuk do të suksese. Qëndrimi im është se mund të jetë vetëm një nga mjetet për përmirësim tregtar e ekonomik, por jo politik,” tha Pendarovski duke përfunduar:

“Mund të jetë vetëm pjesë e Procesit të Berlinit, por jo ta zëvendësojë atë. Procesi i Berlinit është iniciativë që ka institucione, ka resurse që ‘Ballkani i Hapur’ nuk i ka.”

Lidhur me raportet me Maqedoninë e Veriut, Vjosa Osmani e falënderoi Presidentin Pendarovski për përkrahjen e vazhdueshme për Kosovën në procesin e integrimeve evropiane dhe NATO.

“E falënderoj gjithë shtetin për kontributin e dhënë që Kosova të ecë përpara, për mbështetje që na jep për anëtarësimi në organizata ndërkombëtare aty ku Kosova edhe e ka vendin, por edhe për kontributin në kuadër të misionit të KFOR-it,” tha Presidentja e Kosovës duke mos harruar dhe liberalizimin e vizave për të cilin proces ajo tha se shteti tashmë i ka plotësuar të gjitha kushtet, por Bashkimi Evropian ende nuk e ka mbajtur premtimin.

Ndërkohë Presidenti i Maqedonisë Veriut, Stevo Pendarovski foli për dialogun Kosovë-Serbi të cilin e konsideron si zgjidhjen e vetme drejt stabilitetit në rajon.

“Në lidhje me politikën e jashtme dhe ne i mbështesim dhe jemi në dispozicion që t’i tregojmë përvojën tonë në aspiratën në BE dhe NATO. Jemi të gatshëm që të kemi një rajon me prosperitet ekonomik dhe e mbështesim Kosovën në nisma rajonale,” tha Pendarovski duke u shprehur qartë se Maqedonia e Veriutu mbështet zgjidhje reciproke që nuk do të rrezikojë rajonin ndërsa përfundoi:

“E dimë që procesi është i vështirë dhe i komplikuar, por shtetet e rajonit me qëllim të mirë e mbështesin zgjidhjen e kontestit. Maqedonia e Veriut do të mbështesë marrëveshjen finale mes dy vendeve sepse sipas nesh ajo do të kontribuojë në stabilitet në rajon.”

Edhe me këtë rast Vjosa Osmani foli për ndikimin që Rusia ka në rajon përmes trampolinës së saj, Serbisë.

“Kosova dhe rajoni ballafaqohen me rreziqe të mëdha për shkak të tendencave destabilzuese të Rusisë nëpërmes Serbisë. Kosova është e përkushtuar jo vetëm të refuzojë ndikimet dashakeqe, por edhe të bashkëpunojë me partnerët tanë që të parandalohen ndikimet e këtilla destabilizuese. Rajonit i duhet ecje me hapa konkretë drejt integrimit evropian, por edhe paqe e stabilitet afatgjatë. Por, krejt kjo dëmtohet nëse ndikimi i Rusisë rritet nëpërmes trampolinës së saj, Serbisë,” tha Presidentja e Kosovës e cila u pyet dhe për “Grupin e Kumanovës”, për të cilin rast tha se Kosova është e gatshme ta ndihmojë Maqedoninë e Veriut për të hapur një hetim ndërkombëtar në lidhje me këtë rast ndërsa përfundoi.

“Duhet të presim që procesi të përfundojë e të zbardhen të gjitha rrethanat që kanë të bëjnë me rastin. Rasti ndodhet në Gjykatën Supreme dhe pasi të merret vendimi, ezaurohen të gjitha mjetet juridike sa i përket procesit. Edhe kryeministri i Maqedonisë së Veriut, Zoran Zaev shprehi gatishmëri për hetim ndërkombëtar ose përfshirje të ekspertëve nga jashtë që rasti të zbardhet. Kosova do të ofrojë mbështetjen e nevojshme.”

Pas takimit me homologen Vjosa Osmani, Presidenti i Maqedonisë së Veriut, Stevo Pendarovski, u takua me kryetarin e Parlamentit të Kosovës, Glauk Konjufca dhe Kryeministrin Albin Kurti.