Vjosa Osmani: Kosova nuk është e lirë derisa të plotësohen tri postulatet e Presidentit Rugova

Kandidatja për Kryeministre e Lidhjes Demokratike të Kosovës, Vjosa osmani e tha qartë në Viti se Kosova nuk është plotësisht e lirë derisa të plotësohen tri postulatet e Presidentit Rugova: liria, pavarësia dhe demokracia.

“Këtyre tri postulateve ua ka zënë frymën krimi dhe korrupsioni në Kosovë, i cili do të marrë fund me fitoren tonë në zgjedhje. Askush nuk mund ta ndalë vullnetin e qytetarëve të Kosovës për fitoren e LDK-së dhe kthimin e qeverisjes me duar të pastra në Kosovë.”

Me fitoren në zgjedhje, tha Vjosa Osmani, më 6 tetor do të përfundojë pushteti i atyre që abuzuan me shtetin dhe do t’ju kthehet pushteti qytetarëve.

Duke folur për planin qeverisës, Kandidatja për Kryeministre e LDK, tha se 100 milionë euro në vit do të kursehen nga luksi i deritanishëm i qeveritarëve, ndërsa për katër vite qeverisje do të kursehen 400 milionë euro.

Ndërsa për komunën e Vitisë, ajo tha se do të investohet në lidhje rrugore me Gërlicën dhe do të përfundojë ndërtimi i Zonës ekonomisë të nisur nga qeveria Mustafa.

Kandidatja për Kryeministre e Lidhjes Demokratike të Kosovës, Vjosa Osmani, tha se sikur në vitet e ‘90-ta, mërgata jonë i është bashkuar LDK-së për çlirimin e dytë të Kosovës.

“Mërgata jonë ka qenë gjithmonë në anën e drejtë të historisë. Ajo përveç dërgesave për familjet kosovare, gjatë viteve të ‘90-ta ka financuar arsimin, shëndetësinë dhe institucionet e Republikës së Kosovës, ndërsa ka financuar edhe luftën. Mërgata jonë tashmë është bashkuar me projektin e LDK-së për çlirimin e Kosovës nga krimi dhe korrupsioni.”