Vjosa Osmani: Kosovës i duhen politikanë të “Modelit Rugova”

Kandidatja për kryeministre e LDK-së, Vjosa Osmani sot në fshatin Korishë tha se Kosovës i duhen politikanë këmbëngulës, vizionarë, që secilit qytetar ia mundësojnë realizimin e ëndrrës në Kosovë.

Duke përmend burrështetasit Clinton dhe Blair, Osmani shtoi:

“Kur presidenti Clinton e kryeministri Blair vinin në Kosovë na thonin: politikani më këmbëngulës që kanë njohur ndonjëherë ishte Dr. Rugova. Ai komunikonte butë, por argumentonte thellë. Ai na e krijoi modelin çfarë është këmbëngultësia e çfarë është besimi,” tha Osmani.

Duke folur për nevojën e Kosovës për politikanë këmbëngulës, ajo kujtoi modelin për të cilin fliste Ibrahim Rugova:

“Sot na duhen politikanë që t’i mbrojnë institucionet nga krimi e korrupsioni; politikanë që janë këmbëngulës, të cilëve, sikur thoshte Rugova “kokën mund t’ua ndërroni, por mendjen kurrë”.

Këtë mund ta bëjë vetëm një politikane e cila kurrë s’i ka ndërruar qëndrimet e saj.

“Unë s’e kam keqpërdorur kurrë besimin tuaj,” tha Vjosa Osmani para banorëve të fshatit Korishë duke shtuar se LDK e bën qeverinë me njerëz që i përkulen vetëm qytetarit, por jo krimit.

“Asnjë hap i qeverisë së ardhshme s’do të bëhet pa ju, sepse për mua posti i kryeministrit nënkupton shërbim dhe jo privilegj,” premtoi Kandidatja për kryeministre e LDK-së, Vjosa Osmani, para banorëve të Korishës.