Vjosa Osmani: LDK nuk do të qeverisë kurrë me parti siç është PDK!

Kandidatja për Kryeministre e LDK-së, Vjosa Osmani, u zotua në Dragash se LDK kurrë nuk do të qeverisë me parti siç është PDK.

“Ne dëshirojmë që për rininë e mrekullueshme të Dragashit dhe të krejt Kosovës të krijojmë kushte që ata të punojnë në Kosovë dhe të krenohen me Kosovën e tyre. Ne dëshirojmë të krijojmë kushte ku vajzat dhe djemtë më të mirë të këtij vendi do të jenë stema jonë e krenarisë.”

Opoja e di shumë mirë, tha Vjosa Osmani, se ditë të mira po na presin pas 6 tetorit:

“Sepse ne e kemi vendosur familjen në qendër të programin tona. Ne dëshirojmë që jeta për nënat dhe baballarët tanë të jetë e përballueshme financiarisht.”

Duke konstatuar mbështetjen e madhe që LDK, ajo tha se i duket e panevojshme të merret me kundërshtarët politikë.

“Dragash i dashur, Opojë e bukur, me çikat më të mira, me djem, burra dhe gra të mrekullueshme, do t’i jepni bukuri fitores së madhe të LDK-së më 6 tetor. Ata që do të na votojnë janë edhe shumë përtej kësaj salle. Kur po e shoh këtë përkrahje qytetare, po më duket e panevojshme të merrem me kundërshtarët e mi politikë,” tha Osmani duke shprehur besimin që panistat s’kanë më çka kërkojnë në Dragash.

Ndërkohë merita kryesore pse në këtë rajon nuk ka pasur gjakmarrje, sipas Osmanit i takon grave fisnike opojare.

“Ishin gratë e Opojës ato që e mbajtën familjen bashkë, ishin gratë e Opojës ato që i mbajtën shqiptarët bashkë. Nuk lejuan gjakmarrje. Ata që thonë se gruaja shqiptare nuk ka guxim, përgjigjen e marrin në Opojë.”

Kandidatja për Kryeministre e LDK-së, Vjosa Osmani, u zotua se LDK kurrë nuk do të qeverisë me parti që ia kanë ngulur thikën pas shpine, siç është PDK.

“Vetëm kush e ka përnjëmend luftën kundër krimit dhe korrupsionit mund të bëhet partneri ynë qeverisës. Ju zotohem se ju kurrë më s’keni me u turpërue me liderët tuaj.”

Në fund, për Programin e saj qeverisës u shpreh:

“Dragashi është komuna më e harruar e Kosovës, që meriton më shumë respekt për djersën dhe punën e secilit qytetar. Nuk do të lejomë që grantet e subvencionet t’i marrin të korruptuarit, do të garantojmë që ato grante t’i marrim bujqit dhe blegtorët e vyeshëm të kësaj ane.”