Vjosa Osmani nga Gjilani: Shtetin do t’ia kthejmë qytetarit!

Kandidatja pēr Kryeministre e LDK-së, Vjosa Osmani, në tubimin përmbyllës elektoral në Gjilan u zotua se do t’ia kthejë shtetin qytetarëve.

“Puna ime është që miliardat e asfaltit t’ia kthejë arsimit e shëndetësisë. Puna ime është që mësuesve e shkollave t’i japim dinjitet. Kemi ndarë 300 milionë euro në fondin investiv, rininë do ta mbajmë në Kosovë si potencialin më të shenjtë. Ministrat e Qeverisë time nuk do ta kalojnë mëngjesin në gjykata e pasdite në qeveri. Ministrat e Qeverisë time do të jenë shembull i punëve me duar të pastra. Beteja jonë e sotme është mes dorëzimit përfundimtarë dhe shpëtimit, mes ikjes dhe qëndrimit.”

Gjatë këtyre ditëve të fushatës, tha Vjosa Osmani, është dëshmuar rilindja e frymës rugoviane.

“Kam takuar bujq që mezi sigurojnë kafshatën e bukës, kam parë ndërmarrës që kafshatën e mundit të tyre bëheshin gati ta ndanin me padronët e tyre në formë të përqindjes. Pesha e dhimbjes së qytetarëve duhet të kthehet në shpresë. Kjo në mua ngjallë besimin e jashtëzakonshëm se duhet të rimëkëmbemi e jo të dorëzohemi. LDK na ka mësuar se si kultivohet fryma e mobilizimit, prijësi ynë historik na ka mësuar se si duhet të jemi këmbëngulës. Projekti i LDK-së po rilind më i fortë se kurrë. Liria mbetët premisa jonë më sublime dhe ne duhet t’ia garantojmë secilit qytetarë.”