Vlorë, kush ishte shënjestra e atentatit sot. Në Babicë…

Shënjestra e të shtënave me armë zjarri sot në Vlorë dyshohet të ketë qenë një person i njohur për Policinë lokale dhe jo vetëm.

Fjala është për Inez Hajrulla, i cili kishte vetëm pak kohë që kishte dalë nga masa e arrestit shtëpiak, në detyrim paraqitje.

Hajrulla i kishte shpëtuar edhe një tjetër atentati me eksploziv në mes të Vlorës, në vitin 2017, kur makina e tij u hodh në erë dhe ai mbeti i i gjymtuar, me një këmbë. Megjithatë pas kësaj ngjarje ai u arrestua, pasi policia i gjeti një armë pa leje. Nga ana tjetër, ai ka qenë i dyshuar edhe për një grabitje me armë, po në Vlorë, por pas arrestimit u la i lirë për mungesë provash.

Vitin e kaluar ai pati sërish probleme me policinë, pasi u mor në pyetje në lidhje me zhdukjen e Elis Troqes.

Burime nga Policia e Vlorës thanë se paraditen e sotme ai ka qenë i shoqëruar nga një person, i identifikuar me emrin Elvis dhe po lëviznin bashkë me makinë. Në një moment ata janë qëlluar me armë zjarri nga dy persona që ndodheshin në një makinë tip “Land Rover”, e cila u gjet e djegur në Babicë pak kohë pas ngjarjes, bashkë me dy armë brenda.

Nga shkëmbimi i zjarrit u plagos lehtë në këmbë Dajko Cenodema, 58 vjeç, punonjës i Bashkisë së Vlorës, i cili po pinte kafe në një lokal buzë Lungomares.

Deri tani Policia ka identifikuar vetëm objektivin e atentatit dhe mikun e tij, por nuk dihet ende asgjë për autorët e sulmit me armë.

Ndërsa mësohet se edhe Inez Hajrulla e miku i tij i janë përgjigjur me armë të shtënave që vinin nga makina tjetër.

Burimet thanë se shkëmbimi i zjarrit nga makina në makinë ka zgjatur për afro 100 metra, më pas dy mjetet janë zhdukur.

Pas atentati të, policia e Vlorës ka nisur kontrollet për të gjetur autorët, ndërsa kanë zbarkuar edhe forcat e ndërhyrjes së shpejtë, FNSH dhe Delta Forcë.

Kontrollet janë fokusuar më së shumti në fshatrat Babicë e Vogël, Babicë e Madhe Shushicë, Bestrovë, Kërkovë, Bunavi etj. ku ndikuar edhe vendodhja e automjetit që u gjet i djegur, ndërsa janë kontrolluar edhe disa shtëpi në qytet.

Policia e Vlorës konfirmon se ka disa të dyshuar për ngjarjen, por ende asnjë të ndaluar ose të identifikuar si autor i mundshëm i ngjarjes.