Vlorë, përfundon mbledhja e Qeverisë. Ja kur do të bëhen publik emrat e ministrave të rinj…

Në Vlorë ka përfunduar mbledhja e Qeverisë Rama, me Gramoz Ruçin dhe Taulant Ballën, pas analizës së Ministrive, çështjeve zgjedhore dhe përcaktimit të detyrave në PS, për garën e ardhshme elektorale.

Të fundit që braktisën ambientet e vilës qeveritare në Vlorë, ishin kryeministri Edi Rama, kryetari i Parlamentit Gramoz Ruçi dhe Sekretari i Përgjithshëm i PS-së, Taulant Balla. Mësohet se kjo treshe ka vendosur që mbledhja e Asamblesë Kombëtare e Partisë Socialiste të zhvillohet  më 7 shtator, ku pritet që Edi Rama të zyrtarizojë vendimin nëse do të ndryshojë ekipin qeveritar, apo do të vijojë ende me të njëjtët njerëz.

Burime nga takimi i Vlorës theksojnë se, Edi Rama nuk është se ka veçuar punën e ndonjërit, për të lënë që të kuptohet se kush mund të jetë pjesë e ndryshimeve,  por ngelen surprizat si arma e tij më e fortë mendore e në rastin e Rilindjes edhe politike.

Ndryshe, për shkak të diskutimit të çështjeve elektorale dhe zgjedhjet e ardhshme lokale, sot në takim ishin të  pranishëm edhe bashkëkryetari socialist i Reformës Zgjedhore, Bledi Çuçi dhe kryetari i bashkisë Tiranë, Erion Veliaj.