Voltalia për Kurban Bajram, Rama: Thyem këtë ritual pushimi që të mos u mohojmë miqve francezë…
Kryeministri Edi Rama shkeli Ditën e Kurban Bajramit për të firmosur marrëveshjen me kompaninë Voltalia për ndërtimin e Parkut Fotovoltaik të Karavastasë ndërsa kërkoi mirëkuptim sepse i është dukur e udhës që të mos u mohojë miqve francezë për të qenë të pranishëm në nivelin më të lartë të kësaj kompanie
Marrëveshjen nga pala shqiptare e firmosi Ministrja e Infrastrukturës dhe Energjisë, Belinda Balluku, e cila me rastin e firmosjes së marrëveshjes, tha se Voltalia propozoi çmimin prej 24.89 euro për megavat, i cili është i jashtëzakonshëm. Ndërsa Kryeministri Edi Rama bëri me dije se investimi 100 milion eurosh fillon nga muaji shtator.
”Është një ditë e shënuar pushimi në kalendarin e Shqipërisë kjo e sotmja. Përfitoj nga rasti të uroj gëzuar Kurban Bajramin. Me kërkesën për mirëkuptim që ne e kemi thyer këtë ritual pushimi. Por e kemi bërë sepse na është dukur e udhës që të mos u mohojmë miqve francezë për të qenë të pranishëm në nivelin më të lartë të kësaj kompanie. Dhe të bindur që ky është lajm shumë i bukur për ekonominë, dhe për imazhin e vendit tonë pasi me firmosjen e marrëveshjes së sotme, në Shqipëri fillon një emër i madh dhe Voltalia do na ndihmojmë jo vetëm të diversifikojmë energjinë në Shqipëri duke përdorur diellin, por edhe të hedhim më shumë dritë mbi Shqipërinë në Francë, ku Shqipëria njihet pak dhe në përgjithësi nuk njihet saktë nga njerëzit të cilët ia kanë dëgjuar emrin, përgjithësisht jo për arsyet e duhura apo për ato që ne do të donim.”
Një nga asetet më të çmuara, tha Edi Rama, është që ka një pasuri të jashtëzakonshme në ujë dhe diell.
“Pikërisht mbi këtë pasuri mund të ngrihet dhe po ngrihet një sektor energjitik i fortë. Falë këtij investimi të parë te dielli. Jo vetëm i bazuar ky sektor tek energjitë e rinovueshme por shton dhe energjinë diellore si potencial i madh që sapo nisim ta shfrytëzojmë. Këtu vlen të kujtohet fjala e Thomas Edison, që do të investoja të energjia diellore, dhe shpresoj përpara mos na mbarojë nafta dhe qymyri.”
Ndryshe, Parku fotovolatik i Karavastasë është më i madhi i projektuar në vend me 140 MW, ku 70 megavat janë të ndarë për prodhim dhe shitje në treg të lirë dhe 70 megavat me çmim të rregulluar. Çmimi i rregulluar zgjat për 15 vite dhe do të blihet nga OSHEE.
