Voltana Ademi i drejtohet Ambasadorëve, Pjerin Ndreu e shkarkon dhe zgjedh veten në krye të SHBSH
Sot Kryetarja e Bashkisë Shkodër, Voltana Ademi, në emër të SHBSH i është drejtuar me një letër ambasadorëve dhe Misioneve të Huaja në vendin tonë, ku denoncon kapjen e Shoqatës nga individë të Partisë Socialiste, por kjo nuk e penguar Kryetarin e Bashkisë Lezhë, Pjerin Ndreu, që të zhvilloj mbledhjen e jashtëzakonshme të Asamblesë së Përgjithshme të Shoqatës së Bashkive, dhe ta zgjedhë veten e vetë pasi shkarkoi nga detyra Voltana Ademin.
Pas mbledhjes Pjerin Ndreu u mundua të sqaroj atë që, sipas tij, ka ndodhur në këtë Asamble:
“Kjo është Asamble e Jashtëzakonshme e mbledhur sipas statutit nga 1/5 e anëtarëve. Në Asamble marrin pjesë kryetarët e bashkive, të 15 bashkive dhe kryetarët e këshillave bashkiakë. Nga 30 morën pjesë 23. Zgjodhëm ekipin drejtues të shoqatës e cila kishte dy vite që nuk mblidhej, asnjë nga anëtarët nuk vihej në dijeni. Kërkuam mbledhjen e jashtëzakonshme të Asamblesë. Pas propozimeve dhe votimeve u zgjodh kryesia e shoqatës e përbërë nga tre vetë, unë u zgjodha kryetar. Ne nuk merremi me fantazira, në shoqata aderojnë bashkitë dhe jo kryetarët, nuk ka të bëjë me emrin e kryetarit, nuk kanë të bëjnë emrat“.
Ndryshe, para zhvillimit të kësaj Asambleje, Voltana Ademi në emër të SHBSH i është drejtuar me një letër ambasadorëve duke theksuar se kryetarët e rinj të bashkive nuk janë anëtarë të shoqatës.
Në 30 qershor mbahet në Gjykatën Kushtetuese seanca për zgjedhjet e 30 qershorit ku pas shkarkimit të Voltana Ademit, Shoqata e Bashkive do të përfaqësohet nga kryetari i ri socialist, që do të mbajë dhe tjetër qëndrim lidhur me këtë çështje.
LETRA
Shoqata e Bashkive të Shqipërisë, përmes një letre drejtuar ambasadorëve dhe Misioneve të Huaja në Shqipëri, ka shprehur edhe një herë shqetësimin për kapjen e SHBSH-së nga individë të Partisë Socialiste.
Shoqata në fjalë ka publikuar edhe një email, që sipas SHBSH vërteton pretendimet e saj.
Në emailin që mban datën 7 qershor dhe u drejtohet anëtarëve të Komitetit Drejtues të Shoqatës së Bashkive, thuhet se me porosi të Pjerin Ndreut do të zhvillohet një mbledhje e jashtëzakonshme me qëllim mbrojtjen e interesave të shoqatës gjatë përfaqësimit në Gjykatë Kushtetetuese lidhur me zgjedhjet e 30 qershorit 2019.
“Të nderuar Shkëlqesi, Më datën 24 maj 2021 përmes letrës dërguar në emër të Shoqatës së Bashkive të Shqipërisë (SHBSH), ndamë me ju shqetësimet tona mbi një iniciativë të kohëve të fundit për të kapur ilegalisht Shoqatën e Bashkive të Shqipërisë (SHBSH), veprime te ndërmarra nga individë, anëtarë të Partisë Socialiste, pa të drejta legjitime dhe jo anëtarë SHBSH. Dyshimet tona tashmë u vërtetuan nga një email i komunikuar, tekstin e të cilit po e dërgojmë të plotë bashkangjitur”, thuhet në shkresën e Shoqatës së Bashkive.
