Von der Leyen: KE, paketë të veçantë për investime në Ballkan
Ballkani Perëndimor është pjesë e Evropës dhe e ardhmja e këtij rajoni është në Bashkimin Evropian, tha sot në fjalimin vjetor për gjendjen e bllokut, Presidentja e Komisionit Evropian, Ursula von der Leyen, ndërsa vendimin e BE-së për të nisur negociatat e anëtarësimit me Shqipërinë dhe Maqedoninë e Veriut, e vlerësoi si vendim historik.
“E ardhmja e gjithë rajonit është në BE. Ne ndajmë të njëjtën histori dhe të njëjtin fat. Ballkani Perëndimor është pjesë e Evropës e jo vetëm një stacion në rrugën e mëndafshit,” tha von der Leyen, duke paralajmëruar se së shpejti Komisioni Evropian do të dalë me një paketë të veçantë për investime në këtë rajon.
Pjesën më të madhe të fjalimit të saj para deputetëve të Parlamentit Evropian, von der Leyen ia kushtoi krizës së shkaktuar nga pandemia e koronavirusit, masat që ka ndërmarrë BE për t’u përballur me këtë krizë si dhe prioritetet e BE-së për të ardhmen.
Procesin e zgjerimit të Bashkimit Evropian dhe Ballkanin Perëndimor, von der Leyen e ka përmendur vetëm shkurtimisht në fjalimin e saj, duke rikonfirmuar përkushtimin e saj për rajonin e Ballkanit Perëndimor.
Tradita për fjalimin vjetor për gjendjen e bllokut kishte nisur nga kryetari i mëhershëm i Komisionin Evropian, Jose Manuel Barroso, ishte vazhduar edhe nga Jean Claude Juncker dhe tani këtë traditë e vazhdoi edhe Ursula von der Leyen, e cila ende nuk ka mbushur një vit në krye të Komisionit Evropian.
