Vonesa në Aeroportin e Prishtinës, shkaku greva e punëtorëve

Punëtorët e Aeroportit Ndërkombëtar të Prishtinës “Adem Jashari”, sot kanë mbajtur grevën një orëshe ashtu siç e kanë paralajmëruar ditë më parë, por kjo grevë që zgjati deri në orën 09:00, ka krijuar tollovi të madhe dhe vonesa disa orëshe edhe tek qytetarët që po prisnin për të udhëtuar.

Punëtorët përmes kësaj greve po kërkojnë kompensim dhe benifite tjera për rrezikshmërinë, eliminimin e dallimeve në paga, pagesa e përvojës së punës, orët e punës gjatë vikendeve të paguhen sipas ligjit të punës dhe pagesën e shujtës.

Kryetari i Sindikatës së Pavarur të Aeroportit Ndërkombëtar të Prishtinës “Adem Jashari”, Bashkim Latifi duke e quajtur të suksesshme grevën e sotme, i ka quajtur normale edhe tollovit e shkaktuara në aeroport.

Ai thotë se nëse nuk reflekton menaxhmenti greva do të vazhdojë edhe nesër e cila do zgjas 2 orë, e më pastaj edhe greva gjithë ditore gjatë ditës së mërkurë.

Në anën tjetër rrëmujën e shkaktuar dhe vonesat e shumta në fluturime i ka arsyetuar zëdhënësja e Aeroportit Ndërkombëtar të Prishtinës, Valentina Gara, e cila tha se këto vonesa kanë ndodhur pasi që njëri nga grevistët ilegalisht e ka ndërprerë linjën e valixheve.

Teksa ka siguruar se edhe në ditët në vijim gjithçka do jetë nën kontroll dhe se fluturimet do realizohen me kohë, Gara tha se do ndërmarrin masat e nevojshme për këtë gjë.

Gara tutje ka përgënjeshtruar Sindikatën e Pavarur të Aeroportit të Prishtinës të cilët kanë thënë se nuk po ofrohet dialog nga menaxhmenti. E për këtë ajo tha se përpos përgjigjeve të dhëna me shkrim, është caktuar edhe një menaxher i lartë që të merren me këtë çështje.

Lidhur me akuzat që ka hedhur  menaxhmenti i Aeroportit Ndërkombëtar të Prishtinës”, për ndërprerjen e linjës së valixheve, kryesindikalisiti i punëtorëve të Aeroportit, tha se menaxherët janë munduar që punonjësit t’i detyrojnë ta vazhdojnë punën përkundër që kanë qenë në grevë.

E për menaxherin e caktuar për dialog, ai tha se nuk është i duhuri dhe se nuk e përfaqëson menaxhmenin e Aeroportit të Prishtinës.

 Në anën tjetër, udhëtarët që po prisnin që të udhëtonin drejt destiancioneve të tyre u shprehen tejet të mllefosur me këtë gjendje.

Riza Muriqi, i cili ka dy ditë që pret për të udhëtuar drejt Zvicrës, tha se bashkatdhetarët nuk kanë faj për gjendjen e punëtorëve.

Ai apeloi që ata që kanë pakënaqësi t’i drejtohen udhëheqësve të vendit për të gjetur zgjidhje, e jo të shkaktohen këso tollovi.

Edhe Halim Morina tejet i nervozuar me gjendjen e krijuar, thotë se bashkëshortja e tij për shkak të vonesës për fluturim do e humb kontrollin  mjekësor.

Ndryshe, punëtorët e Aeroportit Ndërkombëtar të Prishtinës ”Adem Jashari”, kanë mbajtur greva dhe protesta edhe javë më parë, ndërsa për nesër kanë paralajmëruar një grevë dy orëshe, e cila do nis në orën 08:00