Votat e kandidatëve, numërohen 876 vendvotime, numërimi përfundon në 9 komuna në Kosovë

Komisioni Qendror i Zgjedhjeve, KQZ, e Kosovës ka bërë të ditur se deri më sot janë numëruar 876 nga 2533 vendvotime me votat e kandidatëve për deputetë.

“Sipas të dhënave të pranuara nga Qendrat Komunale të Numërimit (sipas tabelës) në të cilat është duke vazhduar procesi i numërimit të votave të kandidatëve apo ka përfunduar, deri më 14 shkurt 2025 janë numëruar 876 vendvotime nga 2,533. Procesi i numërimit të votave ka përfunduar në 9 Qendrat Komunale të Numërimit, QKN, në komunat: Novobërdë, Obiliq, Shtërpcë, Junik, Hani i Elezit, Partesh, Ranillug, Kllokot dhe Mitrovicë e Veriut,” ka bërë të ditur KQZ.

Sipas Komisionit Qendror të Zgjedhjeve të Kosovës, aktualisht procesi i numërimit është duke vazhduar në 25 Qendra Komunale të Numërimit.

Njëkohësisht në Qendrat Komunale të Numërimit po bëhet verifikimi i votave të subjekteve politike dhe numërimi i votave për kandidatët për deputetë.