Votat me postë, publikohen rezultatet. KQZ: Rinumërim në 530 vendvotime!

Në Qendrën e Numërimit dhe Rezultateve ka përfunduar publikimi i rezultateve të votimit përmes postës ndërkohë sot Komisioni Qendror i Zgjedhjeve i Kosovës, ka vendosur të rinumërohen edhe 530 vendvotime.

13241 është numri i fletëvotimeve të vlefshme nga votimi përmes postës. LVV prin me 7030 vota, LDK 2158 vota, PDK 2139, Nisma-AKR 916 vota, AAK-PSD 555 vota.

Zëdhënësi i KQZ-së Valmir Elezi tha se QNR ka arritur të përmbyllë numërimin e fletëvotimeve nga jashtë vendit brenda një dite.

“QNR ka arritur të përmbyllë numërimin e fletëvotimeve nga jashtë vendit brenda një dite dhe rezultati i numërimit të këtyre fletëvotimeve nga jashtë vendi është pasqyruar në tabelën prapa jush. Në tabelë janë të pasqyruara vetëm fletëvotimet e vlefshme që i takojnë secilit subjekt politik”, tha ai.

Në rinumërim shkojnë edhe 530 vendvotime

Sot Komisioni Qendror Zgjedhor ka vendosur të rinumërohen gjithsej edhe 530 vendvotime.

KQZ fillimisht kishte vendosur të rinumërohen 314 vendvotimeve, tash sipas tyre, janë edhe 530 vendvotime të kësaj natyre, që duhet të rinumërohen.

Komisioni Qendror Zgjedhor, në një konferencë për media, ka bërë të ditur se numërimi i votave me kusht pritet të fillojë ditëve të ardhshme.

Kryetarja e KQZ-së, Valdete Daka, tha se janë 149 vendvotime por shënimi është jo i saktë i subjekteve.

Janë 24 vendovotime me probleme teknike të cilat nuk mund të procesohen në bazën e të dhënave. 81 vendvotime ku subjekti nuk ka vota ndërsa kandidatët kanë vota. 89 vendvotime ku kandidati ka më shumë vota se subjekti dhe 187 ku kandidatët kanë më shumë vota se sa subjekti.

Rinumërimi i këtyre vendvotimeve do të fillojë në ora 16.

Kryetarja e KQZ-së, Valdete Daka, ka ftuar edhe Prokurorinë e Policinë, nëse e shohin të arsyeshme që të jenë prezente gjatë rinumërimit.