Votat nga Diaspora: Nga 44.19% e kutive të numëruara, 81.89% ka marrë LVV
Në Qendrën e Numërimit dhe Rezultateve vazhdon procesi i numërimit të fletëvotimeve nga votimi jashtë Kosovës, përkatësisht nga votimi në përfaqësi diplomatike.
Sipas të dhënave të përditësuar në orën 23:48 në faqen e KQZ të Kosovë, janë numëruar 44.19% e kutive. Nga këto numërime rezulton Lëvizja Vetëvendosje ka marrë 81.89%, LDK-ja, 7.21, PDK-ja 5.75%, AAK-Nisma, 1.54% dhe Koalicioni për Familjen ka marrë 1.07%.
Ndryshe, më 8 shkurt 2025 është votuar në 30 përfaqësi diplomatike me gjithsej 43 vendvotime dhe sipas të dhënave nga 20.324 votues të regjistruar kanë votuar 75.57% e tyre ose 15.352 shtetas të Kosovës që gjatë regjistrimit kishin përzgjedhur këtë mënyrë votimi.
“Procesi i numërimit është transparent dhe vëzhguesit e akredituar janë njoftuar me kohë. Pas përfundimit të numërimit të ndonjë vendvotimi, brenda një kohe të shpejtë rezultatet për subjektet politike dhe kandidatët, të ndarë sipas përfaqësive diplomatike, do të shfaqen në platformën http://rezultatet2025.net”, tha zëdhënësi i KQZ-së, Valmir Elezi.
Valmir Elezi tha se procesi i votimit më 8 shkurt është organizuar në 16 ambasada dhe 14 konsullata të Republikës së Kosovës, të cilat janë të vendosura në 19 shtete të ndryshme.
Pas përfundimit të numërimit të votave nga përfaqësitë diplomatike, zëdhënësi i KQZ-së, Valmir Elezi, tha se planifikohet që të fillojnë me numërimin e fletëvotimeve nga votimi përmes postës.
