Votat për kandidatë, KQZ vendos të rinumërohen të gjitha votat në 28 komuna

Pas konstatimit të shumë parregullsive dhe vjedhjeve të votave të identifikuara, Komisioni Qendror i Zgjedhjeve, KQZ, ka vendosur që të shkohet në rinumërim të plotë të votave të kandidatëve për deputetë në çdo komunë të Kosovës.

“Sot, para mbledhjes së KQZ-së, ky raport është diskutuar në mbledhjen e Këshillit për Operacione Zgjedhore, nga ku kanë dalë dy rekomandime kryesore: Rinumërimi i të gjitha vendvotimeve edhe për 28 komunat tjera dhe ndërprerjen e mandatit për përfaqësuesit e subjekteve politike në Komisionin Komunal të Zgjedhjeve në komunën e Prizrenit,” tha kryetari i KQZ-së së Kosovës, Kreshnik Radoniqi duke sqaruar se ky vendim është marrë për shkak se ky rajon del të ketë parregullsitë më të mëdha.

“Analiza numerike e veçon komunën e Prizrenit si rastin më ekstrem. Pas rinumërimit në QNR të komunës së Prizrenit janë zbritur nga rezultati 29,343 vota për kandidatë, të cilat u ishin regjistruar atyre në QKN të Prizrenit. Po ashtu, pas rinumërimit u janë shtuar 16,366 vota kandidatëve, të cilat nuk ishin regjistruar saktë në këtë QKN.”

“Sipas raportit nga vendvotimet e rinumëruara në Qendrën e Numërimit dhe Rezultateve, rezulton se pas rinumërimit në QNR janë zbritur nga rezultati 36,007 vota për kandidatë, të cilat u ishin regjistruar atyre në QKN. Po ashtu, pas rinumërimit u janë shtuar 20,978 vota kandidatëve, të cilat nuk ishin regjistruar saktë në QKN,” tha kryetari i KQZ-së së Kosovës, Kreshnik Radoniqi.