Votim historik, Asambleja Parlamentare e Këshillit Evropës: Kosova anëtare e KiE!

Me 131 vota për, 29 kundër dhe 11 abstenime, Asambleja Parlamentare e Këshillit të Evropës miratoi rekomandimin për anëtarësimin e Kosovës në KiE, votim ky historik i cili pritet të konfirmohet edhe nga Këshilli i Ministrave të Jashtëm që do të zhvillohet në muajin maj.

Votimi i këtij rekomandimi i hartuar nga deputetja greke, Dora Bakoyannis, miratuar paraprakisht nga Komiteti për Politikë dhe Demokraci i KiE arriti të marrë më shumë se 2/3 e domosdoshme përkundër kërcënimit të përfaqëseusve serbe se vendi i tyre do të largohet nga kjo organizatë.

Vlenë të përmendet se përballë mobilizimit serb në Mal të Zi, Bosnje Hercegovinë dhe Hungari nga ana e Presidentit të Serbisë, Aleksandar Vuçiç, si dhe amandamenteve të përgatitura që konsistonin në Kosovën e pajetueshme e deri te formimi i Asocacionit të komunave me shumicë serbe, përveç se u kundërshtuan, anëtarësimin e Kosovës në Këshillin e Evropës e mbështetën edhe shtetet që nuk e kanë njohur Kosovën shtet të pavarur, si Spanja, Greqia, Rumania e Ukraina.

Bakoyanis: Kosova, demokraci funksionale

Hartuesja e Rekomandimit, deputetja greke Dora Bakoyannis, tha se gjatë punës së saj, asnjë gur nuk ka mbetur pa u lëkundur në përgatitjen e Raportit dhe tha se është konfirmuar se, pavarësisht disa mangësive, Kosova është demokraci funksionale, ndërsa i bëri thirrje Këshillit të Ministrave të ftojë Kosovën të bëhet anëtare e Këshillit të Evropës.

Juristët, tha ajo, e kanë konfirmuar qëndrimin se Kosova i përmbush kërkesat bazike për anëtarësim në Këshillin e Evropës ndërsa sqaroi se Raporti nuk prek çështjen e njohjes apo mosnjohjes së Kosovës dhe se kjo çështje duhet të mbetet kompetencë e shteteve.

Bakoyannis ka përmendur hapat që ka bërë Kosova për t’i përmbushur kushtet, përfshirë edhe zbatimin e vendimit të Gjykatës Kushtetuese për pronësinë e Kishës Ortodokse Serbe në Deçan, duke e quajtur si problemin më të madh në zbatimin e ligjit në Kosovë që ka pritur nga viti 2016.

Themelimin e Asociacionit të komunave me shumicë serbe në Kosovë, Bakoyannis tha se e ka konsideruar si çështje krejtësisht në kompetenca të brendshme të Kosovës, duke e cilësuar dhe një gur themel në procesin e dialogut mes Kosovës dhe Serbisë që e udhëheqë BE-ja. Prandaj, shtoi ajo, kjo çështje nuk është në duart e Këshillit të Evropës.

Me këtë rast ajo foli edhe për komente agresive që i ka marrë për Raportin, shumica prej të cilave ishin nga vendet që nuk e kanë njohur Kosovën, duke qenë e qartë edhe ndaj tyre, kur tha se u ka thënë që duhet të jenë të sinqertë dhe të pranojnë se këto vende në asnjë rast nuk do ta mbështesnin raportin.

“Sepse ata refuzojnë idenë e shtetit të Kosovës, e jo vetëm respektimin e kushteve,” tha Bakoyannis duke e thënë troç se nuk e kishte për detyrë të merret me çështjen e shtetësisë.

“Po të ishte kështu, unë nuk do të pranoja ta bëja raportin,” tha Bakoyannis duke shtuar se do të ishte në harmoni me qëndrimin e vendit të saj, Greqisë.

Në fund, hartuesja e Rekomandimit, deputetja greke Dora Bakoyannis, tha se ka kërkuar nga Kosova të sigurojë që shpronësimet e pronave të pakicës serbe të kryhen në respektimin më të rreptë të ligjit, ndryshe, në rast pranimit të Kosovës në KiE, shpronësimet e paligjshme të tokës do t’i nënshtrohen kontrollit të Gjykatës Evropiane të të Drejtave të Njeriut.

Miqtë e Kosovës

Mbështetje për anëtarësimin e Kosov në Këshillin e Evrop nuk munguan nga aleatët por vlenë të veçohen shtetet që nuk e kanë njohur shtetin e pavarur të Kosovës por sot votuan për anëtarësim në KiE.

Deputete nga Spanja, Nerea Ahedo, tha se i takon grupit që ka mbështetur pavarësinë e Kosovës, përkundër qëndrimit të shtetit të Spanjës dhe e mbështet anëtarësimin e Kosovës në Këshillin e Evropës.

“Ka pyetje që duhet të zgjidhen. Anëtarësimi do të forconte të drejtat e njeriut. Ne do të mbështesnim këtë rrugë [të anëtarësimit]. Mirëpresim integrimin dhe mendojmë që kjo do të jetë edhe një mënyrë për të promovuar stabilitetin në atë zonë,” tha Nerea Ahedo duke vazhduar të qëndroj stoike si mike e Kosovës në mbështetje të pavarësisë së saj.

Deputet i Ukrainëss, Oleksii Goncharenko, ishte më i qartë se kurrë dhe e votoi publikisht votën për anëtarësim të Kosovës.

“Dua të uroj Kosovën. Kosova e meriton. Bota e lirë duhet të bashkohet,” tha deputeti ukrainas Goncharenko, vendi i të cilit gjithashtu nuk e njeh pavarësinë e Kosovës.

Ndërkohë, deputeti rumun Iulian Bulai nga pesëshja e BE që nuk e njeh pavarësinë e Kosovës, tha se e përkrah anëtarësimin e Kosovës dhe se pret që Kosova t’i përmbushë obligimet që vijnë me anëtarësim në Këshillin e Evropës.

“Lufta jonë nuk është për shtetet, por për të drejtat e individëve. Ne po mbrojmë të drejtat e individëve, jo të shteteve dhe etnive. Vendimi i sotëm do të thotë më shumë të drejta për mbi 1.6 milion njerëz, plagët e të cilëve ende po shërohen dhe janë të obliguar të krijojnë një të ardhme të përbashkët. Kosova është gati dhe meriton të pranohet në Këshillin e Evropës, por duhet të sigurojë një mbrojtje të duhur për komunitetin serb,” tha Iulian Bulai si përfaqësues i grupit, Aleanca e Liberalëve dhe Demokratëve të Evropës.

Homologu i hartueses së Rekomandimit, Dora Bakoyannis, deputeti grek, Alexis Tsirpas, përveç se e përgëzoi për punën e bërë, e deklaroi publikisht votën për anëtarësimin e Kosovës në Këshillin e Evropës.

Miqtë e Vuçiçit

Përveç asqerëve të Vuçiçit nga Mali i Zi dhe Bosnje Hercegovina, në shërbim të Serbisë dhe kundër Kosovës doli dhe njeriu që ka blerë njërën ndër shtyllat kryesore të ekonomisë shqiptare, kryeministri hungarez Viktor Orban. Ndonëse kjo nuk i bënë përshtypje Kryeministrit Edi Rama meqë lufta po bëhet kundër Kosovës, atë që bëri sot në Këshillin Evropës deputeti Zsolt Nemeth nga Partia Evropiane Konservatore , nuk e ka bërë Hungaria as si pushtuese e tokave shqiptare.

“Një ndër arsyet kryesore është çështja e mosthemelimit të Asociacionit të komunave me shumicë serbe. Çështja e dytë është Serbia. Mospërfillja e interesave të Serbisë është destabilizuese,” tha Nemeth duke menduar të bindë të pranishmit se po arsyeton kundërshtimin e tij për anëtarësimin e Kosovës por që amandment i tij nuk u votua as nga ata që i kishte në krah të luftës kundër Kosovës.

Deputetët serb nga Serbia, Bosnje Hercegovina dhe Mali i Zi ishin për keqardhje sa që njëri prej anëtarëve të Komitetit shprehu habinë se si mendojnë këta të shkojnë Bashkimin Evropian. Amandamentet e tyre pa nivel nuk do ti hartonte as ai krimineli Aleksandar Vulin që drejton sot Shërbimin Sekret edhe pse thotë se ka dhënë dorëheqje duke nisur nga vajtimi i deputetëve serb në KiE se fëmijët serb në Kosovë nuk shkojnë dot në Kishë deri te kërcënimi se nëse Asambleja Parlamentare e KiE e miraton anëtarësimin e Kosovës, Serbia do të largohet nga Këshilli i Evropës.

Biljana Pantiç Pila nga Serbia duke kritikuar Raportin e deputetes greke tha se çështja e themelimit të Asociacionit të Komunave të Kosovës nuk mund të anashkalohet.

“Ju keni vendosur të shkelni ligjin ndërkombëtar. Nëse lejoni të ashtuquajturën Kosovë të anëtarësohet në Këshillin e Evropës, pa themelimin e Asociacionit, atëherë Asociacioni nuk do të themelohet asnjëherë,” ishte e bindur ajo por jo dhe deputetët tjerë që i hodhën poshtë gjithë amandamentet që kishin dalë nga impianti i Beogradit.

Maja Vukiçeviç, injorancën e saj përveç si deputete e Partisë Popullore Demokratike proruse në Parlamentin e Malit të Zi e trashi edhe me mënyrën e kundërshtimit të antarësimit të Kosovës në Këshillin e Evropës.

Ndërsa serbi Branislav Borenoviç nga Bosnje Hercegovina shkoi edhe më larg përveeç se u shpreh kundër anëtarësimit të Kosovës në KiE.

“Duke vendosur në agjendë pranimin e të ashtuquajturës Kosovës po dëshmojmë kolapsimin e të drejtës ndërkombëtare, në zemër të Evropës,”

Ndryshe, me konfirmimin e këtij miratimi të Asamblesë Parlamentare të KiE për anëtarësimin e Kosovës në Këshillin e Evropës nga Këshilli i Ministrave të Jashtëm që në rastin më të mirë mund të zhvillohet në muajin maj, Kosova bëhet zyrtarisht anëtare e Këshillit të Evropës.

Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit me seli në Strasburg të Francës, e themeluar më 1949.

Anëtare të KiE janë 46 shtete duke përfshirë këtu 27 vende anëtare të Bashkimit Evropian dhe të gjitha vendet e rajonit.