Votimet e 30 Qershorit, Lulzim Basha: Janë dhe do të jenë zero!

Pas takimit me drejtuesen e misionit të vëzhguesve të OSBE-ODIHR, Audry Glover dhe vendimit të Këshillit të Europës që të mos dërgojë në Shqipëri një Delegacion Vëzhgues Zgjedhjesh nga Kongresi për shkak të pasigurisë së vazhdueshme në lidhje me organizimin e zgjedhjeve lokale në Shqipëri më 30 Qershor, Kryetari i Partisë Demokratike, Lulzim Basha, e bëri të qartë se votimet e 30 Qershorit janë dhe do të jenë zero.  

“Në Shqipëri nuk ka dhe nuk ka për të pasur zgjedhje të lira dhe të ndershme për aq kohë sa Edi Rama është kryeministër dhe për aq kohë sa kriminelët e politikës dhe të rrugës që vodhën zgjedhjet në Durrës, Dibër dhe gjithë Shqipërinë të dalin para drejtësisë. Votimet e 30 qershorit janë nul, janë dhe do të jenë zero.”

Dhe jo vetë kaq! Votimet e 30 Qershorit, thekson Lulzim Basha, janë tentativë për grusht shteti i Edi Ramës për të rrëmbyer të gjithë qeverisjen vendore të Shqipërisë, me të njejtat banda dhe kriminelë që ka vjedhur edhe zgjedhjet e 2015-s dhe të 2017-s.

“Opozita dhe qytetarët janë në këmbë në mbrojtje të Kushtetutës dhe demokracisë! Ne nuk do të lejojmë votime të paligjshme dhe farsë! Nuk do të lejojmë që në Shqipëri të instalohet përfundmisht regjimi autokratik kriminal i Edi Ramës,” tha Kryetari i PD, Lulzim Basha duke përfunduar:

“Ne nuk do të lejojmë që Edi Rama t’i shkojë deri në fund planit të tij kriminal për të mbajtur me dhunë pushtetin dhe për të destabilizuar vendin. Asnjw hap pas! Ne do t’i dalim për zot Shqipërisë!”