Votimi për Teatrin/ Ja si u manipulua dje proçesi, deputetë që nuk ishin në sallë rezultojnë votues

Kuvendi miratoi dje me 75 vota ligjin për Teatrin, në një kohë që PS ka vetëm 74 mandate, dhe pot ë llogarisësh edhe mungesën e ministrit Pandeli Majko, numri i votave zbret në 73, megjithë deputetin Paulin Sterkaj, i cili për shkaqe shëndetësore nuk ka qenë në seancë.

Kjo do të thotë se të pranishëm nga deputetët e PS-së kanë qenë 72 deputetë, që do të thotë se ligji ka marrë 3 vota më shumë. Po cilët janë ligjvënësit që iu bashkuan Ramës në ligjin për shembjen e Teatrit?

Referuar tabelës së votimit, Dritan Bici dhe Eleni Xhina, dy ligjvënës të PDIU-së janë bashkuar me grupin e PS-së në një nga vendimmarrjet më të kontestuara jo vetëm nga politika, por edhe nga shoqëria civile.

Mes emrave që kanë votuar pro është edhe ai i vangjel Tavos, deputetit të LSI. Pork y i fundit nuk ka qenë dje në seancë, gjë që konfirmohet edhe nga Kreu i grupit Parlamentar të kësaj force politike, Petrit Vasili.

“Dje maxhoranca manipuloi votimin e ligjit për teatrin. Deputeti Vangjel Tavo që mungonte në seancë rezulton votues.

Ky është një manipulim banditesk dhe vjedhje votash edhe brenda sallës së Kuvendit nga po ata që vodhën votat në 25 qershor.

Ky votim është nul dhe Kryetari i Kuvendit Ruçi duhet të deklarojë që sot anullimin e votimit dhe përsëritjen urgjente të votimit, përndryshe ai si institucion ka rënë juridikisht, politikisht dhe moralisht.

Prokurorja e Përgjithshme të fillojeë hetimin për këtë vepër penale shume të rëndë të manipulimit të votimit parlamentar.

Tanimë hajdutët e votave janë ulur këmbëkryq në Parlament dhe në krye të qeverisë.

Nëse prokuroria mbyll sytë edhe përpara kësaj atëherë çdo qëndrim ndaj saj është plotësisht legjitim”, shkruan Vasili në një postim.