Voto!

nga Agim Popoci

Sot nuk ke pse ankohesh, vajtosh ose çirresh, sot, Voto!

Voto ndryshimin nëse do ndryshim, por nuk është dhe varianti i vetëm që ke në listën zgjedhore, ke dhe krimin!

Nëse do ndryshimin, voto kundër atij që të largoi nga puna për shkak të bindjeve politike dhe të la në rrugë, të shkatërroi karrierën, familjen dhe jetën tënde.

Voto, kundër atij që të la pa djalë, pa vajzë, pa familje që mori botën në sy, për të ngopur barkun me bukën që ta hoqi nga goja!

Voto kundër atij që të premtoi ujin dhe sot vazhdon ta quaj edhe luks, në njërin prej shteteve me burimet ujore më të mëdha në Evropë/ për metër katrorë dhe numrin e popullsisë, dhe që përmbytet pas 20 minutave reshje shiu.

Voto kundër atij që mjaftohet dhe mburret me 3 shqiptar që kanë lekë nga tre milionë sa ka Shqipëria.

Voto, kundër atij që të vuri traun në rrugën që ndërtoi me lekët tua dhe të detyron të paguash! Dhe, nuk u mjaftua me kaq, erdhi te shtëpia që kishe në proces legalizimi; Po, ta kishte premtuar se ajo nuk rrëzohet sikur edhe babi i tij shpirtëror, Enver Hoxha, të çohet nga varri; Por, solli fadromën! Gazin lotsjellës e kishte për mesazh, mos e tepro, se kishte me ty se të tërhiqte zvarrë, mos u merr me këto vogëlsira terrori komunist.

Voto, kundër atij që të premtoi shëndetësinë falas dhe sot pas suvatimit dhe lyerjes së spitalit, falas nuk është as parkimi në oborrin e spitalit! Po, ishte brenda çmimit që paguaje kafen për mjekun, por nuk ke parë gjë akoma!

Voto, kundër atij që të mohoj lirinë e të menduarit dhe vazhdon ta trajtoj lirinë e shprehjes si luks që na e solli Partia!

Voto, kundër atij që tu fut edhe në shtëpi duke menaxhuar të dhënat e tua personale, sepse partia duhet ta dijë nëse e tradhton, sa para ke në xhep, sa i ke borxh, dhe sa të duhen!

Voto, jo se Kryetari i KQZ, Ilirian Celibashi, sot është më i mirë! Jo, jo është po ai llum socialist që ishte, dhe është për të prishur zgjedhjet. Por menaxhon një strukturë ndryshe, dhe krimin elektoral e ka më të pamundur ta realizoi nga Komisioni Qendror i Zgjedhjeve!   

Ndryshe, voto krimin, atë që të keqtrajtoi, internoi, vrau dhe përdhunoi. Atë që të tha se ra diktatura dhe instaloi një diktaturë në pluralizëm, për tu pasuruar dhe ti të vuash më shumë! Atë që hoqi grurin dhe lulediellin nga ara dhe mbjelli marijuanë! Atë që organizoi protesta për asgjësimin e mbetjeve kimike të Assadit nga amerikanët dhe e shndërroi Shqipërinë në një depo të mbetjeve italiane!

Sot, pas 30 vjet pluralizmi nën kujdesin e patronazhistëve, gjyko dhe voto, që nesër të mos jesh pjesë asaj ushtrie që bojkotoi zgjedhjet dhe i hapi rrugën krimit, që të vazhdoj sundimin e kësaj toke të bekuar nga Zoti ku nuk mund të jesh i varfër.

I vjedhur PO, por, deri kur, kjo është në dorën tënde!

VOTO!