Voton për Kryetar të PD Dega 2 Tiranë, Berisha: Ky revolucion nuk ndalet nga asgjë!
Pas votimit për Kryetarin e PD Dega 2 në Tiranë, Ish-Presidenti Republikës, Sali Berisha, duke e vlerësuar si procesin më demokratik i cili do qëndrojë në themelet e rithemelimit të Partisë Demokratike si një forcë e fuqishme konservatore, ai e bëri të qartë se pëkundër manipulimeve të fundit me procesin gjyqësor të PD, ky revolucion nuk ndalet nga asgjë.
“Dua të uroj nga zemra çdo demokrat dhe demokrate të 14 degëve të PD-së që firmosin sot me votën e tyre kryetarin e ardhshëm të degës së PD-së dhe njëherazi fundin e kryetarokracisë dhe presidencokracisë në PD, firmosin vendimmarrjen me votën e lirë të anëtarëve të kësaj partie. Kjo është një arritje historike e panjohur kurrë më parë në historinë e Shqipërisë. Ky është procesi më demokratik, i cili do qëndrojë në themelet e rithemelimit të PD-së si një forcë e fuqishme konservatore.
Këta demokratë dhe demokrate firmosin sot me votën e tyre opozitën e vërtetë shqiptare, kusht i të gjitha kushteve për një shoqëri të lirë dhe ky është një ogur i bardhë, jo vetëm për PD-në, por për mbarë shoqërinë shqiptare. Vetëm një opozitë e vërtetë mund të qëndrojë përballë një narkoshteti dhe një diktature të bazuar në drogën apo ideologjitë. Vetëm një opozitë e vërtetë ka të gjitha shanset dhe mundësitë për të ngjitur PD-në, për ta shndërruar atë në një forcë vendimtare,” tha Sali Berisha duke përshëndeur përzemërsisht demokratët që kanë votuar dhe do votojnë.
Ndërkohë i pyetur nëse i druhet një vendimmarrjeje nga Apeli që rrëzon këto zgjedhje dhe mund t’i nxjerrin nga selia, lideri historik i PD ishte më i qartë se kurrë:
“Ky revolucion nuk ndalet nga asgjë. Nuk besoj se ka pasur një shkelje më të rëndë mbi vlerat e lirisë, mbi të cilat qëndrojnë SHBA-të dhe vendet e lira. Nuk besoj kurrë se ky është një orientim, është një parim i vendit të saj të madh lirisë. Ky është një akt individual, për të cilin ne në mënyrë absolute do të informojmë me hollësi autoritetet e SHBA-ve.”
Ndryshe, zgjedhjet për Kryetar të PD Dega 2 Tiranë po zhvillohen në selinë qendrore të Partisë Demokratike pasi paramilitarët e Lulzim Bashës nuk i hapën Zyrat për të zhvilluar procesin zgjedhor.
