Votoni ndryshimin, Ardian Muka: Më 6 mars, do i kthej bashkinë durrsakëve

Kandidati i koalicionit “Shtëpia e Lirisë” për Bashkinë Durrës, Ardian Muka, në takimin përmbyllës rë fushatës për zgjedhjet e pjesshme vendore të 6 marsit tha se bashkia që ai drejton nuk do të jetë më në duart e oligarkëve ndërsa u zotua se do t’ia kthej bashkinë durrsakëve.

“Një bashki që i shërben durrsakut të thjeshtë. Një bashki që nuk i shërben asnjë partie, që i rri larg politikës dhe do jetë afër qytetarëve. Në këto ditë dhe javë kemi trokitur në dyert e durrsakëve, por më shumë në dyert e zemrave të tyre që u hapën për ne. U bashkuan me pasionin tonë për t’i shërbyer ndryshimit. Ndryshimi do vijë nga zotimi ynë për të shërbyer dhe zotësia jonë.

Trashëgimi kulturore dhe turizmi do jenë shtylla të rëndësishme, të ndërthurura do krijojnë vende pune ku të rinjtë durrsakë të qëndrojë pranë familjeve të tyre. Do pastrojmë qytetin. Bujqësia do jetë prioritet ku produktet bio furnizojnë strukturat hoteliere. Rinisë do t’i krijojmë kushte të shkollohet dhe të punësohet në Durrësin e bukur,” tha Kandidati i “Shtëpisë së Lirisë”, Ardian Muka duke i bërë thirrje qytetarëve që më 6 mars të vazhdojnë rrugëtimin për ndryshimin e Bashkisë Durrës me pasion, energji dhe guxim.

“Kemi shumë për të takuar. Do ndryshojmë faqen e bashkisë sonë. Falenderoj ata që u bashkuan. Kam një thirrje, të vazhdojmë këtë rrugëtim me më shumë pasion, energji, guxim dhe kurajo. Të bashkuar do fitojmë.”

Ndërsa lideri historik i PD, Sali Berisha, duke i bërë thirrje demokratëve të Durrësit ta votojnë se kandidatin e koalicionit “Shtëpia e lirisë” tha se vota për Ardian Mukën është votë për të mbrojtur të ardhmen e qytetit dhe Shqipërisë.

“Ju garantoj se çdo votë për Ardi Mukën do të jetë votë për shërbime ndaj jush, do të jetë votë për të rikthyer bashkinë e Durrësit qytetarëve të saj të nderuar, do të jetë votë për një pushtet të ri i cili do të ketë në epiqendër qytetarin hallet, dertet, nevojat e tij.

Por vota e 6 marsit në Durrës është një votë kombëtare, votë e një rëndësie të jashtëzakonshme. As 200 m larg nga ky shesh zhvillohet e padukshme një betejë midis Durrësit të shekullit të mijëvjeçarëve dhe mafies qeveritare të kryesuar nga Edi Rama i cili kërkon t’ju plaçkisë Durrësin. Jo më pak se 820 mijë km2 baraz me 1 mijë euro për çdo banor qytetar të Durrësit. Është votë për të mbrojtur pronat, për të mbrojtur historinë, për të mbrojtur të ardhmen e Durrësit, por edhe të Shqipërisë. Vota e Durrësit ka një rëndësi vendimtare për t’i dhënë çdo shqiptari mesazhin e madh të ndryshimit, për të ngjallur shpresë dhe ndryshim në zemrat dhe mendjet e mbarë shqiptarëve. Ndryshimi i Durrësit është ndryshimi i Shqipërisë ndaj dhe me 6 mars mbarë kombi pret nga ju votën e ndryshimit, votën e shpresës, votën për Ardi Mukën, votën për koalicionin Shtëpia e Lirisë,” tha Sali Berisha duke shtuar se me 6 mars keni një rast epik për të mbjellë shpresë në çdo zemër shqiptare.

“Ju keni një rast të jashtëzakonshëm për të hapur dyert e zgjedhjeve të reja të parakohshme në mënyrë që Shqipëria të çlirohet nga narkoshteti, të çlirohet nga shteti i bandave dhe plaçkitjeve, dhe të rivendosë ligjin, të rivendosë të drejtë, të rivendosë shpresën dhe të ardhmen si perspektivë për çdo shqiptar.Të dashur miq, Durrësi, spiranca e kombit me perëndimin pret prej kaq e kaq vitesh, afrimin me BE, të cilin Edi Rama me regjimin e tij e shndërroi në një horizont që nuk e kapim dot, në një horizont që largohet nga ne. Ndaj dhe ju takon ju durrsakëve që në 6 mars të votoni për vokacionin perëndimor, për integrimin e Shqipërisë në BE, si të ardhmen më të shkëlqyer të shqiptarëve.”

Lideri historik i Partisë Demokratike përveç rëndësisë vendore dhe euoatlantike të vendimit të 6 marsit foli dhe për rivalen e Ardian Mukës që ka caktuar Edi Rama.

“Me 6 mars ju votoni për të nderuar idealet tuaja, përpjekjet tuaja, arritjet historike tuajat nën qeverisjen e PD. Sot Europa është në luftë, sot diktatori gjakatar i Kremlinit ka shpalosur ushtritë e tij dhe vret në rrugë dhe qytetet e Ukrainës njerëz të lirë. Merr pavarësinë e një vendi të lirë. Sot Shqipëria është anëtare e NATO-s. Shqipërinë në NATO e anëtarësoi qeveria e PD. Mos harroni se Edi Rama vetëm pak vite më parë do të quante NATO-n si nata dhe do të protestonte në një miting me portretet e Enver Hoxhës kundër anëtarësimit në NATO. Vota në 6 mars është votë për idealet tuaja euroatlantike, është votë për anëtarësimin e Shqipërisë dhe të ardhmen e saj,” tha Berisha ndërsa për kandidaten e Ramës për Kryetare të Bashkisë Durrës, tha se është përfshirë në afera korruptive.

“PD anëtarësoi Shqipërinë në NATO. Rama thoshte “nata” dhe protestonte me fotografitë e Enver Hoxhës. Dua të them këtu se zonja Sako nuk ka asnjë të drejtë të konkurrojë për të qenë kryetare e Bashkisë së Durrësit. Për njerëzit ka një kushtetutë morale. Firma e zonjës Sako si kryeinspektore është në dhjetëra dokumente, ku shkruhet se tërmeti i shtatorit nuk solli ndryshime serioze strukturore.

Këta ndërtesa morën jetë njerëzish të pafajshëm, ndërtesa që nëse do rregulloheshin, ata qytetarë do ishin sot midis nesh. Sako nuk ka treguar as drejtësi dhe ndjeshmërinë e një zonje, ndaj qytetarëve të prekur nga tërmeti, që patën fatin e keq, që ndaheshin si disa të PS e të tjerët veçmas, si luftë klasore, u tregua fanatike. Sako është përfshirë edhe në aferën e inceneratorëve.”

Ndërsa për kandidatin e Lulzim Bashës, lideri historik i PD-së, Sali Berisha, tha se Luan Hoti është një demokrat i kthyer në monopolist i cili aktualisht po i bën fushatën Spartak Brahos.

“Krahas saj garon edhe një ish-demokrat i shndërruar në monopolist, Luan Hoti. Dy fjalë dua t’i them. Ke zgjedhur Lul Bravën, ti qofsh, që zgjedh një humbës të pashpresë të lindur dhe kampion në Shqipëri i humbjeve në 30 vite. Por kjo është zgjedhja jote. Por dy gjëra nuk të falen dhe nuk ka demokrat në Durrës që mund të t’i falë. Së pari, nuk të falet monopoli. Ne jemi parti e biznesit zotëri, por anti-monopol.

Monopoli nuk është biznes i ndershëm, monopoli është lloji i biznesit korruptiv me qeverinë i ndaluar me ligj. Ti Luan si demokrat ke shkelmuar programin e PD, partisë anti-monopol, partisë së konkurrencës së lirë. Së dyti, nuk mund të lë pa thënë, e ka marrë vesh i gjithë Durrësi se Spartak Braho me porosi të Edi Ramës, bën fushatë për Lulzim Bravën, bën fushatë për ty Luan. Këtu i këputim të gjitha lidhjet,” tha Berisha duke i bërë thirrje demokratëve të Durrësit, asnjë votë për Lulzim Bravën, asnjë votë për monopolet, asnjë votë për Spartak Brahon, sepse, siç tha, lideri historik i PD, asgjë nuk i lidh me ata.

“Me 6 mars me votën tuaj ju keni një rast epik do të thosha për të mbjellë shpresë në çdo zemër shqiptare. Ju keni një rast të jashtëzakonshëm për të hapur dyert e zgjedhjeve të reja të parakohshme në mënyrë që Shqipëria të çlirohet nga narkoshteti, të çlirohet nga shteti i bandave dhe plaçkitjeve, dhe të rivendosë ligjin, të rivendosë të drejtë, shpresën dhe të ardhmen si perspektivë për çdo shqiptar,” tha lideri historik i PD, Sali Berisha, duke përfunduar:

“Të bashkohemi në 6 mars të gjithë së bashku. Të votojmë Ardi Mukën, përfaqësuesin e shkëlqyeshëm të qytetarëve, të burrave dhe grave, të Durrësit, banorëve të tij nga Ishmi te Shkëmbi i Kavajës.”