Votuesit e regjistruar jashtë Kosovës, KQZ: Hiqen nga listat e votuesve në Kosovë!
Kur kanë mbetur vetëm edhe pak kohë kur Komisioni Qendror i Zgjedhjeve, pritet që të dal me raportin e detajuar për aplikimin e regjistrimit si votues jashtë Kosovës, Zëdhënësi i KQZ, Valmir Elezi, e ka bërë të qartë se të gjithë ata që janë regjistruar me sukses si votues jashtë Kosovës do të largohen nga lista e votuesve në Kosovë.
“Komisioni Qendror i Zgjedhjeve duhet të përpilojë listën e votuesve jashtë Kosovës, e cila përmban të dhënat e atyre votuesve që me sukses janë regjistruar si votues jashtë Kosovës dhe duhet që këta emra t’i largojë nga lista votuese, e cila shpërndahet në vendvotime nëpër Kosovë, në ditën e zgjedhjeve më 14 shkurt,” tha Elezi për Kosovapress duke shtuar se për një afat shumë të shkurtër do të dalin edhe me raportin e detajuar për votuesit jashtë vendit.
“KQZ, respektivisht shërbimi votues gjatë këtij vikendi do të hartojë një raport të detajuar sa i përket periudhës së aplikimit për t’u regjistruar si votues jashtë Kosovës. Në këtë raport do të kemi të qartë sesa është numri i qytetarëve të cilët kanë arritur të regjistrohen suksesshëm si votues jashtë Kosovës dhe sesa prej tyre janë refuzuar për shkak që nuk kanë përmbushur kriteret e përcaktuara me ligj.”
Sa i përket periudhës së votimit përmes postës, Elezi bën të ditur se do të realizohet në një afat kohor prej 10 ditësh.
“Të gjithë ata qytetarë, të cilët do të regjistrohen suksesshëm si votues jashtë vendit do të munden të votojnë përmes postës nga data 2 shkurt. Ligji për zgjedhjet e përgjithshme në Republikën e Kosovës, e ka precizuar që fletëvotimet duhet të pranohen nga ana e KQZ-së para ditës së zgjedhjeve. Pra, periudha e votimit përmes postës zhvillohet nga data 2 deri më datën 12 shkurt.”
Ndryshe, në mbledhjen e KQZ-së e cila u mbajtë dje, Kryeshefi Ekzekutiv i Sekretariatit, Burim Ahmetaj ka bërë të ditur se janë mbi 174 mijë aplikues përmes e-mailit për zgjedhjet e 14 shkurtit. Këto të dhëna janë paraprake tha ai për procesin i cili përfundoi dje më 29 Janar ndërsa sqaroi se numri mund të ndryshojë meqë ka raste kur përmes një e-maili janë dërguar shumë aplikacione.
