Vrasja e Ardit Spahiut në Belgjikë, dy dënime me burgim të përjetshëm dhe 25 vite për Franc Çopjan
Gjykata e Krimeve të Rënda e Brukselit ka dhënë vendimin për vrasjen e 38-vjeçarit Ardit Spahiu, e ndodhur më 27 nëntor 2020 në Sint Jans Molenbeek, duke dënuar disa shtetas shqiptarë si autorë dhe bashkëpunëtorë të krimit.
Franc Çopja, i njohur edhe si Franc Gergely, u dënua me 25 vite burg, pasi sipas gjykatës kishte urdhëruar vrasjen nga Dubai, raporton BW. Ai u ekstradua nga Emiratet e Bashkuara Arabe në Belgjikë në dhjetor 2023. Sipas hetimeve, kodi i tij në aplikacionin e koduar Sky ECC shërbente si pikë lidhëse mes personave të përfshirë në krim.
Një tjetër urdhërues, Mikael Qosja, u dënua me burgim të përjetshëm, ndërsa ekzekutori i vrasjes, Flobenc Meçja, mori gjithashtu dënim me burgim të përjetshëm. Gjykata theksoi se për Qosjan nuk u konstatuan rrethana lehtësuese.
Elton Roci u dënua me 20 vite burg, Elvis Murataj me 8 vite, ndërsa Eljo Bitri me 5 vite burg. Ky i fundit ka bashkëpunuar me drejtësinë që nga nëntori 2023 dhe është bërë bashkëpunëtor i drejtësisë. Sipas trupit gjykues, dënimi më i lehtë ndaj Bitrit lidhet me pendesën, pranimin e fajësisë dhe gatishmërinë për të nisur një faqe të re.
Lufta e klaneve
Sipas hetimeve, vrasja e Spahiut lidhej me një konflikt mes klanit të Çopjave dhe familjes Alibej, në kuadër të një lufte të brendshme mes grupeve kriminale shqiptare në Belgjikë. Mediat belge raportojnë se të dy grupet përmenden në hetime për trafik të madh kokaine.
Ardit Spahiu ishte larguar nga Shqipëria në vitin 2019 dhe ishte vendosur në Belgjikë, për shkak të frikës për sigurinë e tij. Më 27 nëntor 2020, ai u qëllua me armë zjarri teksa dilte nga një lokal në rrugën Condor në Molenbeek. Sipas dosjes, ai u qëllua nëntë herë dhe mori 18 plagë nga plumbat, duke ndërruar jetë në vend.
Mesazhet në Sky ECC
Një rol kyç në zbardhjen e krimit luajtën mesazhet e zbërthyera nga aplikacioni i koduar Sky ECC. Sipas hetuesve, kodi i atribuuar Flobenc Meçjas tregonte se ai e kishte ndjekur viktimën për disa ditë në Bruksel.
Në një mesazh të 19 nëntorit 2020, i lexuar në gjyq dhe i raportuar nga mediat belge, Meçja i shkruante Franc Çopjas: “Shpresoj ta mbarojmë këtë maskara deri në fund të muajit, sepse duhet të kthehem në Shqipëri se do lindë gruaja ime”.
Më 27 nëntor 2020, vetëm dy minuta pas atentatit, nga kodi i Meçjas u dërgua një seri emoji-sh dhe fjala “Ciao”, mesazh që sipas prokurorisë i drejtohej Franc Gergelyt (Çopjas).
Sipas organigramit kriminal të paraqitur nga prokuroria federale, raporton BW, komunikimet përmes Sky ECC lidhën drejtpërdrejt urdhëruesit me ekzekutorin, duke çuar në dënimet e shpallura nga gjykata belge.
