Vrasja e dyfishtë në Shkodër, pistat e hetimit/ Mbi 30 të shoqëruar, por policia ende nuk ka …

Vrasja e dyfishtë e ndodhur mëngjesin e djeshëm në Shkodër ka tronditur jo vetëm këtë qytet, ndërsa 24 orë pas krimit policia ende nuk ka një të dyshuar lidhur me krimin e rëndë. Një ish-oficer policie dhe bashkëjetuesja e tij u qëlluan me të paktën 23 plumba automatiku, sapo parkuan makinën poshtë banesës ku jetonin me qira.

Në automjet ndodhej edhe foshnja 1 vjeç, e cila fatmirësisht ka shpëtuar nga breshëria e plumbave. Burimet policore nga qyteti veri-lindor bëjnë të ditur shoqërimin e të paktën 30 personave që janë pyetur mbi ngjarjen, ndërkohë që janë sekuestruar edhe pamjet filmike të kamerave në zonë.

Por ende nuk ka një informacion mbi motivin e krimit të dyfishtë apo autorët. Pistat në të cilat policia po heton janë ato për shkak të detyrës, ndërsa viktima ka qenë pjesë e efektivëve të policisë në Qarkun e Shkodrës.

Një ditë më parë drejt qytetit ka udhëtuar kreu i Përgjithshëm i Policisë së Shtetit, i cili ka kërkuar informacione mbi ngjarjen, por edhe ka dhënë udhëzimet përkatëse. Për shkak të krimit të rëndë, pritet që hetimet të drejtohen nga Krimet e Rënda, ndërsa policia ka në dorë një automjet tip Mercedez dhe një armë automatike, që u gjetën pas ngjarjes të djegura.

Policia fillimisht do të bëjë analizat nëse gëzhojat e gjetura në vendin e ngjarjes përputhen me atë të armës së gjetur në automjetin e djegur. Dyshimet janë që në krim kanë marrë pjesë dy persona, njëri prej të cilëve ka ndihmuar autorin që ka zbrazur breshërinë.

Burimet policore bëjnë të ditur se nga një rindërtim i ngjarjes, dyshohet se ish-punonjësi i policisë ka tentuar të mbrojë bashkëjetuesen nga breshëria e plumbave. Ai ka marrë një plumb në kokë dhe të tjerë në trup. Po kështu edhe bashkëjetuesja e tij ka marrë disa plumba që i kanë shkaktuar vdekjen.

Hetimet janë përqëndruar në të shkuarën e viktimave.