Vrasja e Ivanoviçit, policia shpall në kërkim dy persona

Drejtoria për Hetimin e Krimeve të Rënda në bashkëpunim me Prokurorinë Speciale të Republikës së Kosovës, PSRK, në kuadër të hetimit të vrasjes së liderit serb, Oliver Ivanoviç, publikoi  fotografitë e dy personave të dyshuar për vrasje, më datë 16/01/2018 në Mitrovicën Veriut.

Policia e Kosovës kërkon nga qytetarët e Republikës së Kosovës që kushdo që ka informacion  për personat  e  dyshuar në fotot e bashkangjitura, të lajmërojë Policinë e Kosovës  përmes numrit konfidencial të telefonit 080019999, adresën elektronike info@kosovopolice.com ose të paraqiten në stacionin më të afërt policor.

Publikimi i këtyre fotografive, ka sqaruar policia, bëhet me qëllim të identifikimit nga ana e qytetarëve, të cilët mund të na ndihmojnë rreth identitetit të këtyre personave të dyshuar.

Pas këtij publikimi nga ana e Policisë së Kosovë, Presidenti i Serbisë, Aleksandar Vuçiç ndonëse kishte dalë në një konferencë shtypi për të sqaruar situatën e krijuar me spiunët rus që bëjnë ligjin në Serbi, ka zbuluar identitetin e dy personave që po i kërkon Policia e Kosovës për vrasjen e politikanit serb në Kosovë, Oliver Ivanoviç.

Vuçiç tha se Policia Serbe kishte marrë në pyetje dy persona të kërkuar nga Policia e Kosovës.

“Ne e kemi pasur këtë të dhënë që nga dita e parë. Ata janë studentë në Fakultetin Teknik në veri të Mitrovicës. Emrat e tyre janë, Ivan Dimitrijeviç dhe Millosh Radosavleviç.”

Presidenti serb nuk specifikoi sekur i kishte ka marrë në pyetje policia serbe por tha se ata erdhën në Polici “me prindërit e tyre” dhe shtoi “ata nuk janë vrasës”.

Ndryshe, politikani serb në Kosovë, Oliver Ivanoviç është vrarë më 16 janar të vitit 2018.