Vrasja e Ivanoviçit, shtyhet për 11 shkurt shqyrtimi i rastit

Shtyhet për 11 shkurt 2020 shqyrtimi fillestar në rastin e vrasjes së Oliver Ivanoviçit. Gjyqtari i çështjes, Valon Kurtaj, ka sqaruar se të akuzuarit nuk e kishin aktakuzën dhe provat në gjuhën serbe pasi Prokuroria Speciale kishte ndryshuar aktakuzën në dispozitivin e parë të aktit akuzues dhe ajo është dorëzuar të premten. Kështu që nuk kishte kohë të përkthehet në gjuhën serbe.

Ndryshe, Prokuroria Speciale e Republikës së Kosovës në fillim të muajit dhjetor ka ngritur aktakuzë kundër gjashtë personave, N.S., M.R., Silvana Arsoviç .A., D.M., Z.J., R.B. për rastin e Olliver Ivanoviçit.

Aktakuza është ngritur për veprat penale “Pjesëmarrje ose organizimi i grupit kriminal të organizuar”, “Keqpërdorim i pozitës apo autoritetit zyrtar”, “Ndihmë në kryerjen e veprës penale Vrasje e rëndë”, “Mbajtja në pronësi, kontroll ose posedim të pa autorizuar të armëve”, “Zbulimi i fshehtësisë zyrtare”, “Keqpërdorim i detyrës zyrtare në bashkëkryerje” dhe “Manipulim me prova, në bashkëkryerje.

Ndryshe, mëngjesin e 16 janarit, Oliver Ivanoviç u qëllua me pesë plumba në hyrje të selisë të partisë së tij.