Vrasja e Martin Canit, PD interpelancë me ministren e Arsimit, Ogerta Manastirliu
Më në fund mazhoranca e Edi Ramës iu bind Kushtetutës dhe pranoi interpelancën urgjente për seancën e sotme plenare e cila u kërkua nga Grupi Parlamentar i Partisë Demokratike, me ministren e Arsimit, Ogerta Manastirliu, pas vrasjes së 14-vjeçarit Martin Cani në shkollën ”Fan Noli” në Tiranë.
Ndërsa prindërit e nxënësve të shkollës “Fan Noli” vazhdojnë të kërkojnë drejtësi për vrasjen e 14-vjeçarit Martin Cani, dhe më shumë siguri në shkolla, që nga dita e krimit të rëndë më 18 Nëntor, askush nuk dënjoi nga pushteti as ti sqaroi dhe as të marrë përgjegjësi por shndërruan këtë tragjedi të ndodhur në pragun e shkollës në një makabritet i cili vazhdoi të vërdalloset në trekëndshin polici-prokurori-qeveri, trekëndësh që siç e do zakoni që 12 vjet, mori dhe një dorë të mirë nga mediat që i kanë në shërbim!
Ndryshe, seanca e sotme plenare ka këtë Rend të Ditës:
SEANCË PLENARE PUBLIKE
E enjte, 5 dhjetor 2024, ora 10.00
RENDI I DITËS
Në mbështetje të urdhrit nr. 84, datë 3.12.2024 të Kryetares së Kuvendit, znj. Elisa Spiropali, rendi i ditës është si më poshtë vijon:
1. Miratimi i procesverbalit të seancës plenare të datës 3.12.2024.
(Neni 44, pika 2, të Rregullores së Kuvendit)
2. Njoftime
(Neni 44, pika 3, të Rregullores së Kuvendit)
3. Interpelancë urgjente me Ministrin e Arsimit dhe Sportit, Znj. Ogerta Manastirliu, kërkuar nga Grupi Parlamentar i Partisë Demokratike.
(Neni 80 i Kushtetutës, neni 97 e Rregullores së Kuvendit)
4. Projektligji “Për ratifikimin e marrëveshjes ndryshuese me shkëmbim letrash të marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për projektin “Për përmirësimin e sistemit të shëndetësisë”, ratifikuar me ligjin nr.57/2015”.
(Në mbështetje të neneve 78, 83, pika 1, e 121, pika 1, të Kushtetutës, dhe neneve 55 dhe 73-77 të Rregullores, shumicë absolute votash për miratim)
5. Projektvendim “Për miratimin e organikës dhe klasifikimit të pagave të punonjësve administrativë pas mbarimit të mandatit të Komisionit të Pavarur të Kualifikimit”.
(Në mbështetje të neneve 78, 179/b, pika 8, të Kushtetutës, neneve 18, pika 1, 70, pika 2, të ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë, neneve 18 dhe 55 të Rregullores së Kuvendit)
6. Projektvendim “Për miratimin e organikës dhe klasifikimit të pagave të punonjësve administrativë pas mbarimit të mandatit të Komisionerëve Publikë”.
(Në mbështetje të neneve 78, 179/b, pika 8, të Kushtetutës, neneve 18, pika 1, 70, pika 2, të ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, neneve 18 dhe 55 të Rregullores së Kuvendit.)
7. Diskutime për çështje jashtë rendit të ditës.
(Në mbështetje të nenit 45 të Rregullores së Kuvendit: Çdo deputet mund të flasë jo më shumë se 5 minuta dhe nëse diskuton në emër të grupit parlamentar, jo më shumë se 8 minuta. Koha e diskutimeve për çështje jashtë rendit të ditës nuk mund të jetë më shumë se 60 minuta.)
