Vrasja e oficerit të policisë, PD: Policët e ndershëm janë braktisur nga shteti i gjunjëzuar nga krimi!
Pas vrasjes në detyrë të nënkomisarit Saimir Hoxha, teksa kontrollonte për kanabis në zonën e mbrojtur të Kune-Vainit, reagon Partia Demokratike përmes Nënkryetarit Enkelejd Alibeaj, duke i shprehur ngushllime familjes e konsideron një tragjedi të paralajmëruar pasi prej vitesh punonjësit e policisë që shërbejnë me ndershmëri në mbrojtje të rendit dhe sigurisë janë braktisur nga shteti i gjunjëzuar përpara krimit.
“Prej vitesh, Shqipëria e sunduar nga Edi Rama është kthyer në vendin kryesor të prodhimit të kanabisit në Europë, pasojat e këtij vullneti të mbrapshtë politik janë shkatërruese për shoqërinë dhe institucionet tona. Që krimi të mos guxojë, që rendi dhe siguria të kthehet në normalitet, zgjidhja që kemi përpara është vetëm një, ndarja përfundimtare e politikës nga krimi dhe ndëshkimi i modelit të ndërtuar nga Edi Rama,” thekson Enkelejd Alibeaj në reagimin e tij përmes rrjetit social Facebook duke shtuar se është modeli Edi Rama ai i cili ka shkaktuar dhe shkakton vetëm dhimbje dhe pasiguri në familjet shqiptare!
Ndërkohë ministri i Brendshëm, Bledi Çuçi, pas vrasjes së oficerit të Policisë së Shtetit në Lezhë, Saimir Hoxha, në reagimin e tij thekson se dora e zezë që shtiu kundër tij do të marrë ndëshkimin më të ashpër sipas ligjit dhe Policia e Shtetit po bën gjithçka duhet në një operacion të gjerë për kapjen e autorit. “Lufta me krimin është e vazhdueshme dhe kurrsesi që ne nuk do të dorëzohemi përballë askujt. Kurrë!” deklaron ministri i Brendshëm duke i shprehur ngushëllime familjes Hoxha!
Reagimi i PD:
“I shprehim ngushëllimet tona familjes së nën/komisarit të policisë, Saimir Hoxha, të vrarë sot në detyrë, teksa kontrollonte për kanabis në zonën e mbrojtur të Kune-Vainit.
Fatkeqësisht kjo është një tragjedi e paralajmëruar, sepse prej vitesh punonjësit e policisë që shërbejnë me ndershmëri në mbrojtje të rendit dhe sigurisë janë braktisur nga shteti i gjunjëzuar përpara krimit, i cili është në revansh për shkak të modelit të bashkëpunimit me krimin të frymëzuar nga ky regjim i korruptuar.
Prej vitesh, Shqipëria e sunduar nga Edi Rama është kthyer në vendin kryesor të prodhimit të kanabisit në Europë, pasojat e këtij vullneti të mbrapshtë politik janë shkatërruese për shoqërinë dhe institucionet tona.
Që krimi të mos guxojë, që rendi dhe siguria të kthehet në normalitet, zgjidhja që kemi përpara është vetëm një, ndarja përfundimtare e politikës nga krimi dhe ndëshkimi i modelit të ndërtuar nga Edi Rama, i cili ka shkaktuar dhe shkakton vetëm dhimbje dhe pasiguri në familjet shqiptare!”, shkruan Alibeaj.
