Vrasja e Pjerin Xhuvanit, arrestohet Zv/drejtori i Policisë së Elbasanit dhe 7 zyrtarë të tjerë

Me urdhër të Prokurorisë së Rrethit Gjyqësor Elbasan, policia arrestoi tetë zyrtarë policie të implikuar në përplasjen me armë zjarri në Elbasan gjatë fushatës zgjedhore të 2021, ku mbeti i vrarë Pjerin Xhuvani, në mesin e të cilëve dhe Zv/Drejtori i Policisë së Elbasanit, Albert Nushi dhe Ish-Zv/Drejtori i kësaj policie, Nikollaq Palla.

Dy Zv/Drejtorët e Policisë u arrestuan, pasi kanë qenë të pranishëm në përplasjen me armë zjarri në Elbasan, katër ditë para zgjedhjeve të 25 prillit 2021, ku u vra Pjerin Xhuvani.

Dy zyrtarët e lartë të policisë, raporton BW, kanë qenë të pranishëm në momentin kur ka ndodhur ngjarja dhe nuk kanë marrë masa për të parandaluar krimin.

“Në kohën e vrasjes, Palla e Nushi kanë qenë zv.drejtorë të Policisë së Elbasanit dhe kanë qenë të pranishëm në vendin e ngjarjes. Në momentin që kanë mbërritur në vendngjarje, në praninë e tyre ka ndodhur vrasja. Rezulton se ata dy kanë shpërdoruar detyrën, sepse nuk kanë marrë masa për të parandaluar vrasjen, si dhe kanë dhënë deklarime të rreme, duke dhënë fakte të ndryshme mbi ngjarjen.

Pjerin Xhuvani ishte pjesë e një grupi simpatizantësh të PS. Mjeku Xhuvani shkoi në mbrojtje të mikut të tij, që sipas PD, ishte duke blerë vota. Ishte PD që njoftoi policinë, dhe në momentin e mbërritjes së policisë ndodhi përplasja me armë zjarri, ku dhe u vra Pjerin Xhuvani. Të gjithë personat e përfshirë ishin ish-ushtarakë ose ish-punonjës policie,” raporton BW duke përfunduar:

“E gjithë ngjarja bëri shumë bujë për faktin se si drejtori i Policisë së Shtetit, por edhe prokurori, gënjyen, duke thënë se nuk ishin gjetur materiale në vendngjarje, ndërkohë që në të vërtetë ishin gjetur materiale. Gjithashtu, ngjarja bëri bujë, sepse ndodhi në sytë e dy zv.drejtorëve të policisë, të cilët nuk arritën të parandalonin vrasjen e mjekut Xhuvani. Nuk është përcaktuar ende se kush qëlloi i pari me armë zjarri në vendngjarje”

Si Nushi, ashtu dhe Palla akuzohen për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, vepër për të cilën vetë policia dhe prokuroria “nuk dinin asgjë” deri më sot ashtu si dhe drejtuesit e tyre!

Në atë kohë, Zv/Drejtori i Policisë në Elbasan ka qenë Nikolla Palla, i cili aktualisht është Zv/Drejtor i Policisë së Beratit, ndërsa tashmë në policinë e Elbasanit është Zv/Drejtor Albert Nushi. Të dy Zv/Drejtorët e Policisë kanë qenë të pranishëm në vendngjarje, në momentin kur ka ndodhur përplasja dhe është vrarë Xhuvani.

Njoftimi:

Elbasan – Drejtoria Rajonale e AMP Elbasan-Korçë ka ekzekutuar urdhrin e Prokurorisë së Rrethit Gjyqësor Elbasan për ekzekutimin e vendimit të Gjykatës së Shkallës së Parë Elbasan për caktimin e masave të sigurimit në lidhje me hetimet mbi procedimin penal nr. 477 të vitit 2021.

Në kuadër të këtij hetimi, Gjykata ka caktuar masat e sigurimit personal “Arrest në shtëpi” për:

– A.N., 55 vjeç, aktualisht me detyrë Zv/drejtor për rendin e sigurinë publike në D.V.P. Berat, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– N.P., 57 vjeç, me detyrë ish Zv/drejtor për rendin dhe sigurinë publike në D.V.P. Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;

Gjithashtu, Gjykata ka caktuar masat e sigurimit personal “Pezullimi i ushtrimit të një detyre shtetërore, apo shërbimi publik” për:

– D. D., 33 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– P.B., 33 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– E.B., 26 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– E. M., 38 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– D.D., 30 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal;
– B.K., 37 vjeç, me detyrë punonjës policie në forcën e posaçme “Shqiponja” në DVP Elbasan, i dyshuar për kryerjen e veprave penale të “Shpërdorimi i detyrës” dhe atë të “Deklarimi i rremë përpara oficerit të policisë gjyqësore”, parashikuar nga neni 248 dhe 305/b i Kodit Penal.

Vendimi është marrë në kuadër të hetimeve mbi ngjarjen e ndodhur më datë 21.04.2021 në qytetin e Elbasanit, ku si pasojë ka humbur jetën 1 shtetas dhe 4 të tjerë kanë mbetur të plagosur. Nga shqyrtimi i akteve hetimore, Gjykata e Shkallës së Parë Elbasan ka vlerësuar të drejtë kërkesën e Prokurorisë për caktimin e masave të sigurisë ndaj shtetasve të mësipërm.