Vrasja e Reformës në Drejtësi/ Ambasadorja Kim dyshon për marrëveshje të fshehtë; Përgjigjen Basha dhe Rama!

A ekziton një marrëveshje mes palëve për të dështuar Reforma në Drejtësi?! Tashmë ky shqetësim nuk është i disa zërave që u sfumuan me shpejtësi nga mediat që nuk po i shërbejnë më publikut, por sot edhe Ambasadorja e Shteteve të Bashkuara në Tiranë, Yuri Kim, uron që mos të jenë të vërteta fjalët për një marrëveshje prapa krahëve për të vrarë Reformën në Drejtësi.

“Shpresoj që fjalët për një marrëveshje prapa krahëve për të vrarë reformën në drejtësi në Shqipëri të mos jenë të vërteta. Reforma është e dhimbshme, e ngadaltë dhe jo perfekte por është e nevojshme, po bën përparim dhe duhet të vazhdojë.”

Kryeministri Edi Rama përgjigjen në reagimin e Ambasadores amerikane Yuri Kim shprehur përmes rrjetit social Twitter për Reformën në Drejtësi, e gjenë tek një thënie e William Shakespeare të cilën gjithashtu e poston në Twitter:

“Ferri është bosh dhe gjithë djajtë janë këtu!”

Lexuesit e shprehjeve profetike të Edi Ramës ndoshta edhe e kuptojnë këtë postim të Edi Ramës të shoqëruar me ripostimin e kryediplomates amerikane në Tiranë por shqetësimi i Ambasadores Kim dhe jo vetëm, është më pranë realitetit shqiptar.

Pas shqetësimit të Ambasadores së SHBA, Yuri Kim, ka reaguar edhe Kryetari i Partisë Demokratike, Lulzim Basha, thekson se, ndryshimet e bëra për reformën në drejtësi nga parlamenti aktual i shërbejnë mazhorancës për të kontrollur dhe kapur politikisht sistemin.

“Çdo ndryshim kushtetues dhe ligjor në lidhje me reformën në drejtësi nga ky parlament është ilegjitim,” thekson Lulzim Basha duke shoqëruar reagimin me ripostimin e shqetësimit të Ambasadores amerikan Yuri ndërsa përfundon:

“Ndryshime të tilla u shërbejnë vetëm atyre që e përdorin pushtetin për të devijuar dhe për të minuar reformën, për të kontrolluar politikisht dhe për të kapur sistemin e drejtësisë.”