Vrasja e vëllezërve Haxhia në Durrës, arrestohen dy bashkëpunëtorët e autorëve

Dy persona janë arrestuar për vrasjen e vëllezërve Besmir dhe Viktor Haxhia në muajin prill të vitit 2020 në Durrës.

Mësohet se në pranga kanë rënë Besian Xhixha dhe Enver Diva nga Fushë-Kruja.

Dy personat e arrestuar dyshohet se kanë lidhje apo bashkëpunuar me autorët e ngjarjes pasi Policia ka gjetur prova që ata janë përfshirë në vrasjen e bujshme prillin e vitit të kaluar në Durrës.

Dyshohet se ata kanë krijuar kushtet për të realizuar vrasjen autorët. Xhixha dhe Diva u kontraktuan nga Nuredin Dumani dhe Talo Çela për atentatin.

SPAK ka rënë në gjurmët e dy bashkëpuntorëve falë dëshmisë së Klevis Allës dhe ata janë përgjuar për disa kohë.

Rezultoi se ata janë kontaktuar nga Nuredimin Dumani e Talo Çela që ishin në kërkim për atentatin. Xhixha e Diva ishin kontaktuar nga dy personat e sipërpërmendur për të kryer atentatin e Besmir Haxhisë në këmbim të një pagese. Dy personat kishin rënë dakord për të kryer krimin, por ditën e ngjarjes një prej tyre doli me COVID-19. Atë ditë dy bashkëpuntorët patën debate të forta me Nuredin Dumanin i cili më pas u detyrua të dalë vetë në terren e të vrasë vëllezërit Haxhia 27 prillin e 2020 së bashku me Talo Çelën, Klevis Allën e Altin Ndocin.

Për vrasjen e vëllezërve Haxhia deri më sot janë arrestuar Klevis Alla dhe Altin Ndoci. Më 27 prill Besmir e Viktor Haxhia u ekzekutuan në Durrës me breshëri plumbash. Ata kishin një seri biznesesh teksa dyshohet se kishin lidhje edhe me grabitjen e Rinasit ku u vodhën 4.6 milion euro.

Vrasja e vëllezërve Haxhia mund të jetë porositur nga grupi kriminal i grabitjes në Aeroportin e Rinasit i cili po kërkonte paratë e vjedhura në Rinas. Në kërkim për këtë ngjarje është dhe Talo Çela, emër mjaft i njohur në Elbasan bashkë me Nuredin Dumanin./BW/