Vrasja në tregun e Milotit, zbulohen të tjera detaje nga ngjarja e rëndë

Të tjera detaje janë zbardhur nga ngjarja e rëndë e ndodhur në Milor ku gruaja qëlloi me pistoletë burrin e saj në mes të tregut.

Mediat raportojnë se njëri nga dëshmitarët në vendin e ngjarjes pohon se çifti nuk kishte ardhur bashkarisht në treg: gruaja kishte ardhur  më herët kurse burri më vonë.

“Nuk  kemi dëgjuar debat po të shtëna, 4 herë dhe burri humbi jetën menjëherë. i njohim dhe s’kemi vënë re ndonjë konflikt mes tyre; nuk e di pse mund të ketë ndodhur. Ata kishin një dyqan rrobash të përdorura në tregun e Milotit”, tha njëri nga dëshmitarët.

Çifti i bashkëshortëve shisnin në tregun e Milotit rroba të përdorura ; ata janë prindër të dy fëmijëve adoleshentë, njeri prej të cilëve 14 vjeç.

Pas krimit, gruaja ka tentuar të largohet, por Policia e ka arrestuar.

Policia e Lezhës dha një informacion paraprak mbi ekzekutimin:

Me datë 17.06.2018, rreth orës 07:10 , në tregun e Milotit në Kurbin, shtetasja V.D. 35 vjeçe, banuese në Rrëshen, për motive ende të paqarta, ka vrarë me armë zjarri tip pistoletë, bashkëshortin e saj, shtetasin K.D. 42 vjeç, banues në Rrëshen.

Menjëherë pas ngjarjes, shtetasja V.D. ka tentuar të largohet por ndërhyrja në kohë e forcave policore, ka bërë të mundur kapjen dhe arrestimin e saj në flagrancë si dhe sekuestrimin e armës së zjarrit tip pistoletë me të cilën është kryer krimi.

Grupi hetimor në bashkëpunim me Prokurorinë e Rrethit Gjyqësor Kurbin, po vazhdojnë hetimet në vendngjarje për zbardhjen e plotë të rrethanave të ngjarjes.