Vrasja pranë Gjykatës Tiranës, Drejtori i Policisë: Ish-vjehrri ekzekutoi dhëndrin, u arrestua…

Pas ngjarjes së rënë në kryeqytet, Drejtori i Policisë së Tiranës, Rebani Jaupi, ka dalë në vendin e ngjarjes ku ka sqaruar se ish-vjehrri ka ekzekutuar dhëndrin pas një procesi të gjatë divorci ndërkohë autori i vrasjes është arrestuar.

“Është vrarë një person, që ka qenë në proces divorci me bashkëshorten. Autori është ish-vjehrri. Është arrestuar autori. Viktima ka pasur proces të gjatë divorci me bashkëshorten, gruaja ka qenë e arrestuar për dhunë në familje. Në këto kushte, babai i vajzës ka qëlluar ish-dhëndrin. Ka dëshmitarë okularë, është e dokumentuar tërësisht autorësia, për hollësi të tjera do iu njoftojmë më pas,” tha Drejtori i Policisë së Tiranës, Rebani Jaupi.

Ndryshe, ngjarja e rëndë ndodhi rreth orës 11:50, në bulevardin “Gjergj Fishta”, në një lokal të njohur pranë Gjykatës Tiranës ku mbeti i vrarë Kudret Saliaj dhe u plagos avokati Adriatik Cama.

Autori, Mexhit Picari, pas krimit u largua me shpejtësi nga vendi i ngjarjes me një makinë Hyundai, duke u arrestuar pak orë më vonë.

Mësohet se Picari ka qenë polic burgu. Vajza e autorit dhe viktima, Kudret Saliaj, ishin në një proces divorci dhe se sot kishin seancën e gjashtë gjyqësore për zgjidhjen e martesës.

Njoftimi i Policisë:

Policia e Tiranes vë në pranga autorin e dyshuar të vrasjes së ndodhur pak më parë. Fale reagimit të menjëhershëm të Policisë dhe veprimeve të shpejta profesionale u bë e mundur kapja dhe arrestimi i autorit të ngjarjes, shtetasi Mexhit Picari.

Menjëherë pas ngjarjes, Policia zhvilloi shumë kontrolle dhe pas informacioneve të marra u bë i mundur lokalizimi i vendndodhjes dhe kapja e autorit.