Vrasje në Agjencinë Kosovare të Inteligjencës

Agjencia Kosovare Inteligjencës, AKI duke pranuar vrasjen që ndodhi sot brenda objektit të kësaj Agjencie ka sqaruar se viktima në fjalë ishte punëtor i restorantit brenda godinës dhe se ndërroi jetë pasi nuk arriti t’i rezistojë plagëve të marra.

“ Sot, më 04.09.2018, rreth orës 09:10, në objektin e Agjencisë së Kosovës për Inteligjencë ka ndodhur gjuajtje me armë zjarri, me ç’rast një zyrtar i sigurimit të brendshëm ka shtënë mbi një punonjës të bufesë. Viktima ka ndërruar jetë në QKUK!

Rasti nuk ka të bëjë me çështje që ndërlidhen me veprimtarinë e AKI-së.

Me hetimin e këtij rasti po merret prokurori kompetent”, thekson Agjencia Kosovare Inteligjencës.

Ndëkohë Zv/Kryeprokurori i Prokurorisë Themelore në Prishtinë, Ibrahim Berisha përveç se ka konfirmuar vrasjen në AKI ka konfirmuar edhe emrin e atij që shtiu me armë.

“Për momentin mund të konfirmojë se ka ndodhë një vrasje brenda ndërtesës së AKI-së. Rasti është duke u hetuar nga prokurori kujdestar, kanë filluar hetimet intensive. I dyshuari në këtë rast është Valon Ibërdemaj, por megjithatë duhet pritur hetimet pasi që jemi në fazën fillestare”, tha Berisha.

Valon Ibërdemaj është arrestuar menjëherë nga Policia e Kosovës dhe i njëjti për 48 orë do të jetë në paraburgim.