Vrau 85 pacientë/ Gjermani, burg të përjetshëm për infermierin

Një gjykatë në qytetin verior gjerman, Oldenburg, ka dënuar një ish-infermier me burg të përjetshëm, pasi është shpallur fajtor për vrasjen e 85 pacientëve, ngjarje e konsideruar si ndër më të rëndat pas luftës në Gjermani.

Gjyqtari, Sebastian Buehrmann, i ka cilësuar vrasjet e 42-vjeçarit, Niels Hoegel si të “paimagjinueshme”.

Ai ka vrarë pacientë përmes injeksioneve në dy spitale në Oldenburg dhe në qytetin e afërt, Delmenhorst gjatë periudhës 2000-2005, derisa është zbuluar, raporton RFE.

Prokurorët janë shprehur se Hoegel ka injektuar pacientët në mënyrë që të tentojë t’i ringjallë ata, dhe këtë e ka bërë ose sepse ka qenë i mërzitur ose ka dëshiruar t’i impresionojë kolegët për aftësitë që ka.

Hoegel ka kërkuar falje, pas përfundimit të gjykimit të tij shtatëmujor.