Vritet biznesmeni në Tropojë, lidhja e tij me Fatmir Haklajn dhe pistat e para
Biznesmeni i qëlluar me armë para karburantit të tij në Bajram Curr është Guxim Gjyriqi, 47 vjeç. Policia e Shtetit duke dhënë detajet e para thekson se Gjyriqi është vrarë me armë zjarri në rrethana ende të paqarta:
“Më datë 05.01.2020, në orën 23:32, në afërsi të Karburantit të tij, në lagjen “Partizani” , është vrarë me armë zjarri në rrethana ende të paqarta, shtetasi G.Gj., 47 vjeç, banues në qytetin e Tropojës. Në vendngjarje ndodhet grupi hetimor ku vijon punën për zbardhjen e rrethanave të ngjarjes, identifikimin dhe kapjen e autorit,” thekson Policia e Shtetit duke bërë të ditur se Shërbimet e Komisariatit të Policisë Tropojë, shërbimet e DVP Kukës, dy grupe të FNSH, vazhdojnë kontrollet dhe krehjen e zonës për të bërë të mundur kapjen e autorit.
Burime për BW bënë me dije se Gjyriqi është ekzekutuar me armë zjarri sapo mbylli lokalin i cili ndodhet afër karburantit të tij rrugën e spitalit, në lagjen ”Partizani”. Autorët e vrasjes së Guxim Gjyriqit po e prisnin jashtë lokalit biznesmenin dhe më pas në ecje e sipër me automjet e qëlluan me breshëri automatiku. Autorët ikën më pas në drejtim të paditur ndërkohë që automjeti është kapur nga kamerat e sigurisë dhe pamjet i janë shpërndarë gjithë komisariateve të Rajonit Verilindor.
Pistat e dyshuara të vrasjes janë për konflikte të kohëve të fundit ose për shkak të konkurrencës ndërkohë janë shoqëruar dhjetëra persona për t’u marrë në pyetje.
Disa orë pas vrasjes një automjet i djegur është gjetur në Golaj të Hasit dhe dyshohet se është e autorëve të vrasjes së Guxim Gjyriqit në Bajram Curr.
Policia vazhdon me krehjen e gjithë zonës për të zbuluar, identifikuar dhe kapur autorët por ndërkohë nga automjeti mund të gjendet ndonjë provë. Fshati Golaj gjendet 55 kilometër larg qytetit ku ndodhi ngjarja.
Po kush është biznesmeni Guxim Gjyriqi, i ekzekutuar para karburantit të tij në Tropojë?!
Guxim Gjuriqi ishte babai i tre fëmijëve dhe nuk njihej si person problematik në zonë. Policia ka marrë në pyetje disa persona që mund të kenë dijeni dhe informacione të vlefshme, përfshirë edhe familjarë. Ndërkohë që janë sekuestruar pamjet filmike të kamerave të sigurisë së biznesit dhe objekteve që ndodhen pranë vendit të ngjarjes.
Por mësohet se Guxim Gjyriqi ka lidhje dhe me Fatmir Haklajn, Ish-Shefin e komisariati në Tropojë dhe një figurë e njohur në vitet ’97, në veçanti për vrasjen e Ish-Deputetit të PD, Azem Hajdari më 12 shtator 1998.
Gjyriqi është kushëri i Fatmir Haklajt, prej nënës së tij.
