Vuçiç: Amerikanët, turqit dhe gjermanët po kujdesen për “fëmijën” e tyre!
Presidenti i Serbisë, Aleksandar Vuçiç ka akuzuar Amerikanët dhe disa nga shtetet perëndimore që, sipas tij, po armatosin fqinjët e Serbisë të cilat janë anëtare të NATO-s dhe Kosovës.
“Amerikanët, turqit dhe gjermanët kujdesen për fëmijën e tyre të dashur,” tha Vuçiç duke aluduar për Kosovën ndërsa shtoi se Washingtoni kohët e fundit kishte dorëzuar automjete të blinduara në Forcën e Sigurisë së Kosovës.
Por Vuçiç tha se tashmë kanë filluar disa nisma për ta forcuar forcën ajrore serbe, veçanërisht në komponetët bombardues ndërsa premtoi forcimin e kapacitetit të mbrojtjes ajrore.
Serbia kohët e fundit mori një sistem të sofistikuar antiraketor nga Rusia, i cili gjithashtu siguroi avionë ushtarakë dhe helikopterë dhe mjete të blinduara. Ndërkohë, Kina ka furnizuar drone për Serbinë.
Zyrtarët amerikanë kanë folur hapur në të kaluarën për vendosjen e sanksioneve ndaj Serbisë nëse Moska vazhdon të dërgojë armë, veçanërisht atë që mund të rrezikojë sigurinë e anëtarëve fqinj të NATO-s.
