Vuçiç braktis partinë SNS, formon lëvizje të re politike

Presidenti i Serbisë, Aleksandar Vuçiç, ka filluar procesin e formimit të Lëvizjes Popullore për Shtetin, dhe pritet të vizitoj të gjitha vendbanimet serbe, raporton media e Beogradit Nova.rs.

Ndryshe, në Serbi ka kohë që përflitet se lideri serb po planifikon të largohet nga kreu i Partisë Përparimtare Serbe, SNS, dhe të formoj një parti të re ose lëvizje politike.

Vitin e kaluar, Vuçiç në një konferencë për shtyp paralajmëroi formimin e një blloku të ri politik për “Serbinë e sjellshme dhe normale”, që do të jetë qytetare dhe kombëtare. Me këtë rast ai foli për nevojën e formimit të një blloku, i cili “në rend të parë nuk do ta kishte as Lindjen dhe as Perëndimin, por interesin e Serbisë”.

“E rëndësishme është që të formojmë bllokun e normalitetit dhe mirësjelljes, bllokun serb. Nuk mendoj kombëtar, por qytetar dhe kombëtar, bllok të mirësjelljes i cili do përballej si me njërën ashtu dhe palën tjetër,” ishte mesazhi i Vuçiç duke konsideruar të rëndësishme që në qendër të formohen lëvizje që “nuk kanë shefa jashtë shtetit”.

Zyrtari i lartë i partisë, SNS, Vladimir Gjukanoviç, i ka bërë thirrje përmes rrjeteve sociale anëtarëve të partisë që të fillojnë me punën për formimin e partisë së re, përgatitjes së akteve të themelimit, mbledhjes së firmave, organizimin e Kuvendit themelues si dhe miratimit të qëllimeve programore të Statutit.

“Punë e madhe është para nesh,” tha Vladimir Gjukanoviç!