Vuçiç i fal Bosnjes 10.000 vaksina AstraZeneca; Mjekët serbë: Është cënuar vaksinimi…
Sot Presidenti i Serbisë, Aleksandar Vuçiç, i ka falë Bosnje Hercegovinës 10.000 doza të vaksinës kundër COVID-19 “AstraZeneca”, gjest i cili u mirëprit nga liderët e këtij vendi ndërkohë ekspertët e Shtabit të Krizës në Serbi ngrenë alarmin për situatën e krijuar duke theksuar se nëse nuk mbyllet gjithçka në këtë vend rrezikohet edhe procesi i vaksinimit.
“Kemi siguruar 10.000 doza të vaksinës AstraZeneca, këto mund ti përdorni në 5.000 ose 10.000 njerëz, se më pas do të bëhet rivaksinimi. Pushteti në Bosnje Hercegovinë duhet të vendos nëse do të shkojnë me mjekët në zonën e kuqe Covid ose në ndonjë mënyrë tjetër. Do të jem i lumtur nëse do të shpëtojmë pesë, nëntë apo dhjetë njerëz,” tha Vuçiç pas dorëzimit të këtij donacioni duke bërë të ditur se në takim me anëtarët e Presidencës së Bosnje Hercegovinës, i ka lutur që ta mendojnë idenë për organizimin e një Samiti të madh Serbi-BeH në Beograd.
Përveç kriminelit serbë në këtë Presidencë, Milorad Dodik, Vuçiçin e falënderuan edhe anëtari kroat, Zhelko Komshiç dhe ai boshnjak Shefik Xhaferoviç.
“Unë e di që ky donacion do të nxis komente të ndryshme, disa do të urojnë e disa do të ofendojnë. Lus njerëzit që na shohin, të mendojnë vetëm për një gjë, nëse vetëm njëra nga këto 5.000 vaksina shpëton qoftë edhe një jetë njeriu në BeH, atëherë gjithçka ia vlenë,” tha Komshiç ndërsa Xhaferoviç shtoi:
“Dëshiroj të falënderoj Serbinë dhe presidentin Aleksandar Vuçiç për aktin e solidaritetit ndaj BeH. Me këtë rast kemi biseduar për çështje shumë më të rëndësishme për marrëdhëniet dypalëshe, por dhe marëdhëniet në rajonin e Ballkanit Perëndimor.”
Dhe derisa në Sarajevë superlativat për Aleksandar Vuçiçin nuk pushuan pasi morën 10.000 dozat e vaksinës “AstraZeneca”, në Beograd Shtabi i Krizës që menaxhon situatën me pandeminë në Serbi, akuzon presidentin se nuk ka përfillë propozimin për shpalljen e gjendjes së jashtëzakonshme dhe mbylljen e të gjitha dyqaneve përveç atyre ushqimore, farmacive dhe pikave të karburantit.
“Pjesa mjekësore e Shtabit të Krizës nuk mund të propozoj ndryshe , përgjegjësinë duhet ta marrë e gjithë shoqëria, pjesa mjekësore e din mirë se kjo masë është goditje për ekonominë, por pavarësisht nga kjo, kjo masë mbronë jetë njerëzish dhe këtë duhet ta themi publikisht. Propozimi është që të ndalohen kontaktet e pambrojtura ndryshe do të shpërthejë gjithçka dhe vetëm atëherë do të jetë e qartë se çfarë do të thotë kur të shpërthejë sistemi shëndetësor,” tha sot për televizionin publik serb, RTS, epidemiologu dhe anëtari i Shtabit të Krizës, Predrag Kon, duke sqaruar se pse pjesa mjekësore e këtij Shtabi po kërkon gjendjen e jashtëzakonshme dhe orën policore.
“Ora policore mund të jetë pa ndërprerje, e kufizuar në kohë, për këtë nuk është diskutuar, dhe as që është e nevojshme në këtë moment, i rëndësishëm është vendimi nëse do të ketë ose jo gjendje të jashtëzakonshme. Nuk mundet grupi prej 10 mjekëve të vendosin për gjendjen e jashtëzakonshme. Ne theksuam atë që është e domosdoshme,” tha Kon duke shtuar se për shkak të përhapjes së koronavirusit është cënuar edhe vaksinimi:
“Njërëzit që ishin në zonën e kuqe po punojnë në procesin e vaksinimit, nuk mund ti bëni të dyjat, rraskapitja ka kaluar çdo kufi, kjo nuk mund të tolerohet,” tha epidemiologu serb dhe anëtari i Shtabit të Krizës, Predrag Kon, deri sa Presidenti i tij në Sarajevë po shiste humanizëm me vaksina Anticovid, aty ku gjithçka joserbe ky shtet ka vra ndërsa tokën e ka mbuluar me mina!
